Tags-Hijr

mat pūchh vārdāt-e-shab-e-hijr ai 'nasīr'
maiñ kyā kahūñ jo kār-e-numāyān-e-nāla thā

zulmat-e-hijr meñ sadā us ne diyā hai hausla
ab ke magar bujhā diyā us ne bhī haar kar diyā

ik sitam ye ke hameñ vasl meñ aayā na sukūñ
ik sitam ye ke tire hijr bhī dekhe na ga.e

vo ḳhvāb thā ki khulā thā darīcha-e-shab-e-hijr
tire visāl kī ḳhushbū makāñ meñ phail ga.ī

un ko gin gin ke shab-e-hijr basar hotī hai
taare āñkhoñ ke na kyuuñ hoveñ ye anjum mujh ko

bekasī-hā-e-shab-e-hijr kī vahshat hai hai
saaya ḳhurshīd-e-qayāmat meñ hai pinhāñ mujh se

hijr meñ apnā aur hai aalam abr-e-bahārāñ dīda-e-pur-nam
zid ki hameñ vo aap bulā.eñ uf rī javānī haa.e zamāne

'haqqī'-e-dil-girafta ke bas meñ na jaane kab nahīñ
hijr meñ shād-kām thā vasl ke darmiyāñ bujhā

sitāroñ se shab-e-ġham kā to dāman jagmagā uThā
magar aañsū bahā kar hijr ke māroñ ne kyā paayā

'habīb' kar ke butoñ kī ulfat abhī se ye hijr kī shikāyat
rahegā ab hashr tak ye jhagḌā yahāñ bhalā infisāl kaisā

ab ham visāl-e-yār se be-zār haiñ bahut
dil kā jhukāv hijr kī jānib balā kā hai

yuuñ shab-e-hijr shab-e-vasl meñ Dhal jaatī hai
koī mujh sā mirī guftār meñ aa jaatā hai

yuuñ hijr meñ barsoñ kabhī lagtī hī nahīñ aañkh
so jaatā huuñ jab aa ke vo kah detī haiñ mar bhī

itnī guzrī jo tire hijr meñ so us ke sabab
sabr marhūm ajab monis-e-tanhā.ī thā

sochoñ pe naqsh haiñ vo jo pal the visāl ke
dukh hijr ke tamām hī lamhoñ pe bojh haiñ

zinda huuñ aur hijr kā āzār tak nahīñ
vo kaam kar rahā huuñ jo dushvār tak nahīñ

hijr kā jashn ham manā.eñ kyā
sard jazbāt par nahīñ rote

khulne lage asrār-e-vafā dīda-o-dil par
jis din se ġham-e-hijr kī mushkil meñ paḌe ho

kaTte hī kaTegī hijr kī shab liye dard chalo tā-sub.h-e-tarab
in shauq kī maarī āñkhoñ se kuchh va.ada-o-paimāñ aur sahī

visāl-e-yār tamannā-e-ḳhām hai shāyad
ye daur-e-hijr abhī nā-tamām hai shāyad