Tags-Hijr

ab vo pahlī sī shiddat kahāñ hai
hijr meñ ve tamāzat kahāñ hai

jab vasl huā us se to sarshār hue haiñ
aur hijr ke mausam ne ri.āyat nahīñ kī hai

hamāre hijr kī tamhīd kyā thī
mirī yādoñ kā daftar dekh lenā

sabhī mausamoñ se guzar gayā koī bojh dil pe liye hue
mujhe raas aa.ī na rut koī na vo hijr kī na visāl kī

mire chāra-gar tujhe kyā ḳhabar, jo azāb-e-hijr-o-visāl hai
ye darīda tan ye darīda man tirī chāhatoñ kā kamāl hai

hijr kī shab udhar allāh idhar vo but hai
dekhnā ye hai ki ab kaun bulātā hai mujhe

ham donoñ ne raat guzārī ā.ankhoñ meñ
ā.īna bhī hijr kā maarā lagtā hai

tirā vasl hai mujhe be-ḳhudī tirā hijr hai mujhe āgahī
tirā vasl mujh ko firāq hai tirā hijr mujh ko visāl hai

ye jiive hijr meñ vo vasl meñ bhī jī nahīñ saktā
takalluf-bar-taraf bulbul ko parvāne se kyā nisbat

koī Takrā.e to is hijr-zada mausam meñ
raat jañgal meñ bahut ḳhud ko jalāyā maiñ ne

maiñ ne kaaTī haiñ bahut hijr meñ us kī rāteñ
us ne bhī kaaTī haiñ gar rāteñ sunāne aa.e

jo āñdhiyāñ sar-e-sahrā-e-hijr uThtī haiñ
un āñdhiyoñ meñ 'razā' naḳhl-e-jān TūTtā hai

kabhī pahroñ us kā bas ik usī kā ḳhayāl thā
vo jo hijr the jo visāl the vo kahāñ ga.e

koī din aur ġham-e-hijr meñ shādāñ ho leñ
abhī kuchh din meñ samajh jā.eñge duniyā kyā hai

lījiye ik misre meñ saarā afsāna
ik taare ko hijr milā tābānī se

ik aur saal kā ġham dil pe ashk ban ke girā
ik aur saal tire hijr meñ guzār diyā

inkār kī lazzat se na iqrār-e-junūñ se
ye hijr khulā mujh pe kisī aur fusūñ se

hijr kā vaqt kāTnā mushkil
tum sitāre shumār kar dekho

māh-rūyāñ kahāñ talak ham ko
ātish-e-hijr meñ jalā.iyegā

ātish-e-hijr ko ashkoñ se bujhāne vaale
tujh ko rone bhī na deñge ye zamāne vaale