Tags-Hijr

be-ābrū hai fan abhī āvāz be-badan
sar par abhī hai hijr kā bādal khaḌā huā

na us kā ant hai koī na isti.āra hai
ye dāstān hai hijr-o-visāl se bāhar

shadīd-tar hai tasalsul meñ hijr kā mausam
kabhī milo ki use mo'tadil banāyā jaa.e

hai ye sach ki mausam-e-hijr meñ mirā ḳhaar ḳhaar badan huā
kabhī yaad tujh ko jo kar liyā to badan ke ḳhaar chale ga.e

na vo yaad hai na vo hijr hai na nigāh-e-nāz kā zikr hai
mire zehn se tirī fikr ke sabhī rozgār chale ga.e

maiñ tire hijr se niklūñgā to mar jā.ūñgā
haa.e vo log jo mehvar se nikal jaate haiñ

shab-e-hijr kā mājrā ko.ele se
likhā jā ke maiñ us ke dīvār-o-dar par

hijr ke saa.e na tasvīr-e-ḳhizāñ
yaar us ke ghar kā rasta aur hai

hijr kī ghaḌiyāñ dekh chuke haiñ maut kā ham ko ḳhauf nahīñ
ye sūrat to dekhī-bhālī hai jānī-pahchānī hai

ajab kuchh mutma.in rakhtī hai ham ko bekalī dil kī
havā-e-hijr kī yūrish se bhī Darne nahīñ detī

hai havāsoñ pe shab-e-hijr kā is darja asar
sub.h ke rañg bhī kaale nazar aate haiñ mujhe

vasl ke rañg bhī badalte the
hijr bhī inqalāb jaisā hai

milā thā hijr ke raste meñ sub.h kī mānind
bichhaḌ gayā thā musāfir se raat hone tak

ek hijrat to mujh ko thī darpesh
hijr bhī us ke darmiyān paḌā

uThāyā maiñ ne shām-e-hijr lutf-e-guftugū kyā kyā
tasavvur ne tirī tasvīr ke muñh meñ zabāñ rakh dī

ab hijr kā mausam aa pahuñchā ham jaan ga.e the jab dil meñ
ik dard ne Derā Daal liyā ik dukh ne bayāñ imkān kiyā

vasl hī vasl rahe hijr kā imkān na ho
ai mire dost ye rishta kabhī be-jān na ho

sahāre par sahar hotī shab-e-hijr
na aate va.ada farmāyā to hotā

ye ek umr purānī sharāb hai yaaro
ḳhumār-e-hijr rahegā visāl kar ke bhī

kyā hijr kyā visāl vahī āshiqoñ kā haal
āḳhir qarār meñ bhī bechārā koī to ho