Tags-Hijr

alvidā.a ai bazm-e-anjum hijr kī shab al-firāq
tā-ba-daur-e-zindagānī intizār-e-yār thā

nashsha-e-sad-jām kaif-e-intizār-e-yār thā
hijr meñ Thahrā huā dil sāġhar-e-sarshār thā

uThā.īñ hijr kī shab dil ne āfateñ kyā kyā
umīd-e-vasl meñ jhelīñ musībateñ kyā kyā

ik nashāt-ārā.ī ik sukūn-e-tanhā.ī
hijr yā visāl achchhā hal kare ye uljhan kaun

mirā to paiġhām vasl kā hai tumhārī taqrīr hijr kī hai
butāñ hai ye bhī ḳhudā kī qudrat savāl dīgar javāb dīgar

makān-e-jāñ laraztā hai havā-e-hijr se
charāġh-e-yād ko rakkheñge kis qindīl meñ

mat pūchh vārdāt-e-shab-e-hijr ai 'nasīr'
maiñ kyā kahūñ jo kār-e-numāyān-e-nāla thā

hijr meñ āñkheñ aañsū ban kar bah jaatī haiñ sochā na.iiñ
vo bhī us din ġhusse meñ thā aur maiñ ne bhī rokā na.iiñ

is ḳhajālat ne abad tak mujhe sone na diyā
hijr meñ lag ga.ī thī ek ghaḌī merī aañkh

hijr meñ dam kā nikalnā hai muhāl
aap aa nikleñ to kuchh mushkil nahīñ

'ābid' mire liye to qayāmat se kam na thī
kahne ko us ke hijr kī saa.at guzar ga.ī

ḳhudā kā hijr asl meñ visāl hai
so is meñ intiqāl kar visāl kar

kisī ke hijr kā chhallā kisī visāl kī chhāp
bichhaḌ ke mujh se tujhe kyā milā dikhā to sahī

ik sham.a kā saaya thā ki mehrāb meñ Duubā
ik maiñ ki tire hijr ke girdāb meñ Duubā

har-chand ki thā hijr meñ andesha-e-jāñ bhī
āḳhir ko to ham se hī uThā bār-e-girāñ bhī

ġham-e-firāq ke kushtoñ kā hashr kyā hogā
ye shām-e-hijr to ho jā.egī sahar phir bhī

roz karte haiñ shab-e-hijr ko bedārī meñ
apnī āñkhoñ meñ subuk ḳhvāb-e-girāñ hai ki jo thā

ik hijr ke sho.ale meñ ka.ī baar jale ham
is aas meñ shāyad ki nayā-pan nazar aa.e

nahīñ milūñgī kisī bhī vasl-āshnā safar meñ
maiñ hijr-mausam kī shiddatoñ meñ tumheñ milūñgī

aaj tanhā.ī ke manzar ne sujhāyā hai 'sa.īd'
mausam-e-hijr kī tasvīr banā.ūñ maiñ bhī