Tags-Hijr

hijr kā qissa bahut lambā nahīñ bas raat bhar hai
ek sannāTā magar chhāyā huā ehsās par hai

chalo ye bhī maanā ai ham-navā ki taġhayyurāt ke mā-sivā
nahīñ mustaqil koī shai yahāñ to ye hijr kyuuñ hai sabāt meñ

phuul shāḳhoñ pe khile aap se aur phir na mile
mausam-e-hijr na kuchh tū ne bhī sochā dekhā

sanam terī judā.ī meñ kaTā hai vaqt mushkil
gine din hijr meñ kitne calendar jāntā hai

bas yahī fiqra ki shām-e-hijr ne maarā mujhe
koī kah aatā to kitnā muḳhtasar paiġhām thā

hijr kī raat so ga.e the 'adam'
sub.h-e-mahshar ko ḳhvāb meñ dekhā

chauñk uThtā hai ġham-e-hijr kā ehsās 'rishī'
un ke aane pe bhī taskīn kahāñ hotī hai

koī ishq thā jo kisī ke jaane se mar gayā
koī zaḳhm hijr kī iddatoñ ke asiir haiñ

shab-e-vasl ishq kī chāñdnī kā ġhurūr the
vahī log hijr kī vahshatoñ ke asiir haiñ

maraz-e-hijr se bachtā nahīñ be-dārū-e-vasl
hai ye āzār baḌā ishq ke āzāroñ meñ

jaane kis moḌ pe de hijr kī sauġhāt mujhe
par gavārā bhī nahīñ tark-e-mulāqāt mujhe

ḳhair se dil ko tirī yaad se kuchh kaam to hai
vasl kī shab na sahī hijr kā hañgām to hai

hasrat-e-ishtiyāq ne aaj kiyā shahīd-e-hijr
mere dil-nigār kā dekh to le mazār-e-shab

din ko ḳhayāl vasl kā raat ko dard-e-hijr hai
shaġhl vo roz kā huā aur ye kārobār-e-shab

kis qadar hijr meñ behoshī hai
jāgnā bhī hai hamārā sonā

maiñ bolī hijr meñ kaise jiyoge tum
vo bolā ruk na jaa.e saañs hī merī

saarī galī sunsān paḌī thī bād-e-fanā ke pahre meñ
hijr ke dālān aur āñgan meñ bas ik saaya zinda thā

bigḌā huā hai hijr meñ kuchh vaqt kā nizām
lamha guzar na paayā ki ik saal ho gayā

tere ḳhvāboñ se hī raushan rahā ye dil kā 'diyā'
hijr meñ ḳhvāb tumhāre nahīñ badle maiñ ne

kushta-e-zahr-e-ġham-e-hijr nahīñ tū to 'hasan'
laḳht-e-dil kyuuñ tire ashkoñ meñ hare aate haiñ