Tags-Hijr

sadma-e-hijr meñ taklīf kareñ
malak-ul-maut se farmā.iyegā

mat dekh ki phirtā huuñ tire hijr meñ zinda
ye pūchh ki jiine meñ maza hai ki nahīñ hai

visāl-rut meñ hijr kī hikāyateñ
udaas kar ga.ī haiñ dil khule hue

'munīr' achchhā nahīñ lagtā ye terā
kisī ke hijr meñ bīmār honā

din ke badle bhī yahī aatī haiñ ġham-ḳhvārī ko
mujh se rakhtī haiñ bahut hijr meñ yaarī rāteñ

hijr meñ sub.h se tā-shām bajā.e shabnam
merī āñkhoñ se lahū rakhtī haiñ jaarī rāteñ

sab kī sab kyā haiñ shab-e-qadr hamārī rāteñ
kaTtī haiñ āñkhoñ hī meñ hijr kī saarī rāteñ

balā se hijr meñ jiine kī intihā to hai
vo ek baar huī yā hazār baar huī

azāb-e-hijr ke lamhāt ham bhulā na sake
dayār-e-ġhair meñ ik pal sukūn pā na sake

haañ ai havā-e-hijr hameñ kuchh ḳhabar nahīñ
ye shīsha-e-nashāt hai jab se bharā huā

merī āñkhoñ meñ tire hijr ke aañsū haiñ jame
vo mire jazboñ kī hiddat se pighal jaate haiñ

kisī ke hijr kā mausam azaab hai 'ġhaznī'
kabhī kabhī to maiñ kahtā huuñ zindagī na rahe

hijr panpā na tirā vasl hameñ raas aayā
kisī maidān meñ taarā na hamārā chamkā

ye soz-o-sāz-e-nihāñ thā vo soz-o-sāz-e-ayāñ
visāl-o-hijr meñ bas farq thā to itnā thā

hijr-nazhādoñ kā hai ek alag hī jahāñ
us se na milnā yahāñ ḳhuub hai apnī jagah

use ḳhabar thī ki ham visāl aur hijr ik saath chāhte haiñ
to us ne aadhā ujaaḌ rakkhā hai aur aadhā banā diyā hai

hijr kī shab to kaT hī jā.egī
roz-e-vasl-e-sanam kī baat karo

ye hijr-zād samajhtā hai kam visāl kī baat
batā jo ramz-o-kināya haiñ ḳhuub phailā ke

ehsān-e-vasl-e-yār bhī manzūr hai magar
āzār-e-hijr-e-yār ke armāñ kareñge ham

aayā hai ab ḳhayāl-e-talāfī tujhe ki jab
is dil ko tere hijr kī aadat sī ho ga.ī