Tags-Hijr

is ko bhī hijr kā tāvān to bharnā hogā
koī dam meñ hai mukāfāt-e-amal hone ko

mausam badle phir bhī hai āshob-e-visāl-o-hijr vahī
haal zamāne kā jab ye ho kyā maazī kyā haal kareñ

hijr kī rut sahn-e-jism-o-jāñ se ruḳhsat ho ga.ī
ḳhushnumā mausam hai ab ham raaz kī bāteñ kareñ

hijr kī zard havā yūñhī agar chaltī rahe
ek bhī peḌ rahegā na harā dhartī par

hijr meñ āh-o-bukā rasm-e-kohan hai lekin
aaj ye rasm hī doharāo ki kuchh raat kaTe

yaad hai jo usī ko yaad karo
hijr kī dūsrī davā hī nahīñ

ab sarguzisht-e-hijr sunāne bhī aa.egā
jo ruuTh kar gayā hai manāne bhī aa.egā

hijr meñ khulte haiñ asrār-e-mohabbat kyā kyā
ġham meñ ye mo.ajiza-e-husn-e-masīhā hī sahī

vus.at-e-chashm ko andoh-e-basārat likhkhā
maiñ ne ik vasl ko ik hijr kī hālat likhkhā

ham mashq-e-fikr-e-vasl-o-ġham-e-hijr se 'asad'
laa.eq nahīñ rahe haiñ ġham-e-rozgār ke

hijr kī rātoñ meñ bhī tanhā kahāñ rahtā hai zehn
tum kabhī aa jaao ho, dushman kabhī aa jaa.e hai

rāhat-e-vasl binā hijr kī shiddat ke baġhair
zindagī kaise basar hogī mohabbat ke baġhair

sham.a kī lau thī ki vo tū thā magar hijr kī raat
der tak rotā rahā koī sirhāne mere

vasl kā sukūñ kyā hai hijr kā junūñ kyā hai husn kā fusūñ kyā hai ishq kā darūñ kyā hai
tum marīz-e-dānā.ī maslahat ke shaidā.ī rāh-e-gum-rahāñ kyā hai tum na jaan pāoge

kabhī mujh se soz-e-hayāt le kabhī mujh se sāz-e-hayāt sun
maiñ fazā-e-qarya-e-hijr huuñ maiñ havā-e-shahr-e-visāl huuñ

hijr meñ jāgīr-e-aish-e-majnūñ huī thī taġhayyur
vasl ke dīvān ne phir ke bahālī kiyā

tujh galī meñ ġhubār ban ke miyāñ
hijr kī ḳhaak ham ne chhānī hai

hijr lāzim hai to ye hijr nibhā.e jaao
jā rahe ho to koī rabt banā.e jaao

ban chukā hai dil savāl ab kisī ke hijr meñ
is pe lā-javāb haiñ ratjagoñ ke darmiyāñ