Tags-Hijr

jab tire ba.ad tirā hijr satā.e mujh ko
tujh ko maiñ yaad karūñ bhuul bhī jā.ūñ aksar

tamām ḳhastagī-o-māñdgī hai ālam-e-hijr
thake thake se ye taare thakī thakī sī ye raat

ye visāl o hijr kā mas.ala to mirī samajh meñ na aa sakā
kabhī koī mujh ko na pā sakā kabhī maiñ kisī ko na pā sakā

zindagī hijr hai aur hijr bhī aisā hai ki bas
saañs tak haar chukā vasl kamātā huā maiñ

raat furqat kī kis ko kahte haiñ
roz-e-hijr-e-sanam ke kyā ma.anī

mazā jo vasl kā chāhe to bār-e-hijr uThā
phir intiqām ho āḳhir ke ta.iiñ kanār-o-bos

paḌegā ran aziyyatoñ kā samt-e-shahr-e-hijr roz
udhar na jā Thahar zarā tū dekh merā haal ruk

zaḳhm agar gul hai to phir us kā samar bhī hogā
hijr kī raat meñ poshīda qamar bhī hogā

guftugū kar rahī thī ḳhāmoshī
hijr kī raah meñ visāl sā thā

dard ke saare hī qissoñ kī yād-dahānī kar lenā
hijr kī raat bahut lambī hai ek kahānī kam na paḌe

ai aañkh tū be-ḳhvāb hai ḳhvāboñ kī talab meñ
ye hijr hī āḳhir tirā in.aam huā kyuuñ

tumhāre hijr meñ jānāñ ye kaisā haal hai merā
na zāt-e-lā-makāñ apnī na imkān-e-makāñ apnā

kaisā sitam hai vasl ke beach
hijr kā aalam baaqī hai

vo jo ik shaḳhs vahāñ hai vo yahāñ kaise ho
hijr par vasl kī hālat kā gumāñ kaise ho

dayār-e-hijr ke roza-guzār chāhte haiñ
ki roza kholeñ tire aur sharāb-e-nāb ke saath

visāl-o-hijr kī sarhad pe jhuTpuTe meñ kahīñ
vo be-hijāb huā thā magar hijāb ke saath

ai jurm-e-ishq tere gunahgār kyā hue
ai dost tere hijr ke bīmār kyā hue

hai hijr phailā huā aur raushnī kam hai
mohabbatoñ ke liye ek zindagī kam hai

badal ke rakh diye hijr o visāl ke mafhūm
mujhe to us ne baḌī kashmakash meñ Daal diyā