Tags-Hijr

vo hijr bhī to gūñgī pahelī se kam na thā
ab vasl aa paḌā hai zarā sochne to de

zindagī hijr meñ bhī yuuñ hī guzar jā.egī
vasl kī ek hī gar raat hai ye bhī na sahī

koī aisā kamāl ho jaa.e
hijr saarā visāl ho jaa.e

shab-e-vasl hone kī hai ye dalīl
shab-e-hijr se din sivā ho gayā

hijr kī raat guzartī hī nahīñ
kab talak bazm pe tārīkī rahe

ātish-e-hijr se kyā Dar jo tirī marzī se
raat kar deñge basar loT ke añgāroñ meñ

ghir ke ghabrāte na the hijr ke āzāroñ meñ
jab ki tāqat thī kabhī aap ke bīmāroñ meñ

mujh pe ik hijr musallat hai hamesha ke liye
aisā jin hai ki koī piir nahīñ khīñch sakā

kaisī haiñ āzmā.isheñ kaisā ye imtihān hai
mere junūñ ke vāste hijr kī ek raat bas

vasl ta.abīr ho nahīñ saktā
hijr kā ḳhvāb maar kar dekhā

yuuñ to hijr kī rāteñ roz hī guzartī haiñ
aaj ai 'sabā' lekin sub.h se udāsī hai

jo lage aag bhī to na ho zau-fishāñ jo bujhe sho.ala bhī to na uThe dhuāñ
na gila hijr kā na sila ishq kā ye vahī hukm thā jo mire naam thā

phir dekhe haiñ vo hijr ke tapte hue din bhī
jab fikr-e-dil-o-jāñ meñ fuġhāñ bhuul ga.ī hai

baḌī tavīl hai 'mahshar' kisī ke hijr kī baat
koī ġhazal hī sunāo ki niiñd aa jaa.e

ek mehmāñ kā hijr taarī hai
mezbānī kī mashq jaarī hai

kuchh hijr ke mausam ne satāyā nahīñ itnā
kuchh ham ne tirā sog manāyā nahīñ itnā

tumhāre hijr meñ aisā bhī vaqt aayā hai
badan TaTol ke dekhā to nabz hī na milī

ham hijr ke māroñ ko kahīñ chain kahāñ hai
mausam nahīñ jachtā hameñ ik aan kahīñ kā

to kyā yaqīn dilāne se maan jāoge?
yaqīñ dilā.ūñ ki ye hijr dil pe baar nahīñ

maiñ saTpaTā ke razā.ī meñ muñh chhupātī huuñ
tumhārā hijr to kamre se jā rahā hī nahīñ