Tags-Hijr

hijr kī muddat dard ke lamhe kyā kyā ma.anī rakhte haiñ
ye sab bāteñ vo dil jaane jis par ġham kā baar paḌe

tahammul ai mohabbat hijr pathrīlā ilāqa hai
tujhe is rāste par tez-raftārī nahīñ karnī

baḌī tavīl hai 'mahshar' kisī ke hijr kī baat
koī ġhazal hī sunāo ki niiñd aa jaa.e

uupar se zaḳhm-e-hijr ko to ham ne bhar diyā
andar se kaifiyat to magar mātamī rahī

tumhāre hijr ke malbe meñ dab gayā koī
tumhāre rog ye bāteñ banā.e jaate haiñ

zaḳhm gintā huuñ shab-e-hijr meñ aur sochtā huuñ
maiñ to apnā bhī na thā kaise tumhārā huā huuñ

visāl hijr siyāsat masā.il-e-duniyā
ġhazal meñ ham bhī ye kyā kyā ḳhayāl le aa.e

so ab sad-haif us ḳhurshīd-rū ke hijr meñ 'jur.at'
yahī rāteñ haiñ aur bāteñ haiñ vo din kyā guzarte the

jaan jaatā hai ab to aa jaanī
hijr kī aag par chhiḌak paanī

qadam qadam dukh dard ke saa.e shahr hue vīrāne bhī
kis ne des ke phūloñ par ab hijr kī raakh uḌaa.ī hai

huā to hai tere hijr meñ dil hamārā jal kar kabāb saaqī
kasar agar hai to itnī hī hai ki puḳhta aadhā hai ḳhaam aadhā

tasavvur hī ke aalam meñ jo vo taklīf farmāte
to kyuuñ furqat-nasīboñ ke liye shab hijr kī hotī

muddatoñ ke ba.ad koī ham se ye kah kar milā
kuchh nahīñ ye hijr bas āh-o-fuġhāñ kā khel hai

luT jā.egī hayāt na thī ye ḳhabar mujhe
ronā paḌegā hijr meñ shām-o-sahar mujhe

maiñ hijr meñ muskurā rahā huuñ
mujh meñ ye hunar kahāñ se aayā

kisī ke hijr meñ is dard se duā māñgī
nidā.eñ aa.iiñ ḳhudā kāmyāb kar degā

visāl-o-hijr se vābasta tohmateñ bhī ga.iiñ
vo fāsle bhī ga.e ab vo qurbateñ bhī ga.iiñ

marīz-e-hijr ye samjhā jo chamkī charḳh pe barq
ye aag señkne laa.ī shab-e-judā.ī choT

kisī ke hijr meñ itnī ghuTan se behtar thā
havā meñ sūrat-e-ġhubāra phaT gayā hotā

palkoñ pe ġham-e-hijr ke sab diip jalā.e
nīñdoñ ke shabistān meñ bhārī mirī āñkheñ