Tags-Hijr

ye hijr ke zaḳhm bhī baḌe lāla-kār dil haiñ
maiñ ghar ke rañgoñ se ghar sajā luuñ yahī bahut hai

koī qissa hijr-o-visāl kā na sunā mujhe
jo harīm-e-dard tak aa gayā so vahīñ milā

hijr kī raat fusūñ-kāri-e-zulmat mat pūchh
sham.a jaltī hai magar nuur nahīñ hotā hai

apne hijr kī baat alag hai apnā ishq musalsal hai
ḳhud se bichhaḌne lagte haiñ to us ke ghar ho aate haiñ

kahte sunte nahīñ kuchh ham to shab-e-hijr meñ par
nāla-e-dil kā javāb āh-e-jigar detī hai

jis ke nashshe meñ koī hijr guzār aa.e haiñ
vo ghaḌī vasl kī ham ne kabhī ruḳhsat nahīñ kī

mausam-e-hijr ke aane ke shikāyat nahīñ kī
ai mire dil tujhe kyā ho gayā vahshat nahīñ kī

us kī āñkhoñ meñ bulāvā hī na thā sach ye hai
ai shab-e-hijr tujhe saath kiyā thā kis ne

tū kahāñ le ke phiregī mirī taqdīr kā bojh
merī palkoñ pe shab-e-hijr ye taarā rakh de

maraz-e-hijr meñ mai garche muzir hai lekin
maiñ to pī jaatā huuñ allāh hai saaqī saaqī

shikva-e-hijr kī ḳhvāhish na kar ai dil ki tujhe
sāmnā ho to koī rañj-o-mehan yaad nahīñ

kisī ke hijr meñ jiinā muhāl ho gayā hai
kise batā.eñ hamārā jo haal ho gayā hai

kahūñ ba-qaid-e-qasam lā-ilāha il-lallāh
ki tāb-e-hijr bas ab mujh meñ ai ilaah nahīñ

mire badan meñ lagī hai jo hijr kī dīmak
maiñ us ko vasl kī tadbīr se alag karūñgā

vasl aur hijr ke mā-bain khaḌā huuñ 'kāshif'
tai na ho paayā ta.alluq kabhī merā us kā

maiñ ne sāhil pe bichhā dī hai saf-e-mātam-e-hijr
lahr koī to miTā degī fasāna us kā

sā.at-e-shām-e-ġham-e-hijr kā sannāTā hai
shahr-e-auhām ko sapnoñ se sajāyā jaa.e

hijr meñ maut bhī aa.ī na mujhe sach hai masal
vaqt par kaun kisī ke koī kaam aatā hai

shab-e-va.ada fasīl-e-hijr se aage chamaktā hai tirā ism-e-sitāra-jū
ki jaise koī paivand-e-ridā-e-sub.h aa jaa.e kisī qindīl kī zad meñ

tirā vasl hai mujhe be-ḳhudī tirā hijr hai mujhe āgahī
tirā vasl mujh ko firāq hai tirā hijr mujh ko visāl hai