Tags-Husn

jab ye meva husn kā ras ras pak kar hovegā tayyār
nā.ika is kī qīmat kā jab dekhā chāhiye kyā legī

kahiye kyūñkar na use bādshah-e-kishvar-e-husn
ki jahāñ jā ke vo baiThā vahīñ darbār lagā

jalva-e-husn ko mahrūm-e-tamāshā.ī kar
be-niyāzī sifat-e-lāla-e-sahrā.ī kar

jo kabhī husn ke hoñToñ pe na aayā 'jāmī'
haa.e vo harf-e-tasallī bhī garāñ hai ab ke

husn-e-be-parvā ko apnī be-naqābī ke liye
hoñ agar shahroñ se ban pyāre to shahr achchhe ki ban

jitnā dekho use thaktī nahīñ āñkheñ varna
ḳhatm ho jaatā hai har husn kahānī kī tarah

kis qadar rañgīñ hai tartīb-e-kitāb-e-zindagī
is meñ afsāna hai shāyad tere husn-o-nāz kā

māh-o-anjum meñ bhī us kā husn jalva-rez hai
āftāb ik aks hai husn-e-karishma-sāz kā

huī hai bā.is-e-tuġhyān-e-ishq garmi-e-husn
jale na sham.a to kyuuñ ghir ke aa.eñ parvāne

sahar jo niklā maiñ apne ghar se to dekhā ik shoḳh husn vaalā
jhalak vo mukhḌe meñ us sanam ke ki jaise sūraj meñ ho ujālā

ḳhaak the ġhuncha-lab aur ḳhvāb thī lahje kī khanak
jhaḌ gayā qabr meñ jab husn-e-sarāpā kā namak

ḳhaak meñ jo milā ho ḳhud us pe sitam se kyā husūl
husn kī ye sarisht hai varna jafā kī vaj.h kyā

paanī se sag-gazīda Dare jis tarah 'asad'
Dartā huuñ aa.ine se ki mardum-gazīda huuñ

ai husn-e-lāla-fām! zarā aañkh to milā
ḳhālī paḌe haiñ jaam! zarā aañkh to milā

numūd-e-husn hai goyā sarāb kā aalam
ye kā.enāt hai hañgāma haa.e bulajabī

hai husn kī sarkār meñ tausīf vafā kī
vo kahte haiñ 'shañkar' hameñ insāñ nazar aayā

har shai meñ tirā husn-e-daraḳhshāñ nazar aayā
jis chiiz ko dekhā mah-e-tābāñ nazar aayā

sunte haiñ ishq kā bāzār bahut garm hai phir
qīmat-e-husn zarā aur baḌhā dī jaa.e

kyuuñ na dekhūñ unheñ nazroñ se ḳharīdār kī maiñ
husn kī garmī-e-bāzār abhī baaqī hai

tere faroġh-e-husn se ye bhī na ho sakā
nazroñ ke hausle to baḌhātī hai chāndnī