Tags-Husn

naqāb udhar vo uThā.eñ idhar maiñ aah karūñ
samand-e-husn pe paḌ jaa.e tāziyāna-e-ishq

shorish-e-āgahī ke saath husn-e-shu.ūr shart hai
zauq-e-junūñ-navāz ab aur na sharmsār kar

tujh se hanūz hai nihāñ fikr kā ik nayā jahāñ
azm-o-amal se ziist ke husn ko āshkār kar

gul-e-fasurda bhī ik turfa husn rakhtā hai
ḳhizāñ ye hai to mujhe hasrat-e-bahār nahīñ

muflisī aur is meñ ghar par ham-nashīnoñ kā hujūm
tīrgī meñ yaas kī dhundlā gayā husn-e-umīd

husn-e-mastūr ko ayaañ kar de
ek ho jaa.e mudda.ā sab kā

rabt hai husn o ishq meñ bāham
ek dariyā ke do kināre haiñ

gayā to husn na dīvār meñ na dar meñ thā
vo ek shaḳhs jo mehmān mere ghar meñ thā

kahā jo maiñ ne gayā ḳhat se haa.e terā husn
to hañs ke mujh ko kahā pashm se gayā to gayā

insāf bhī yahī hai yahī shān-e-husn bhī
haañ haañ nazar churāo qatīl-e-nigāh se

ye ishq jis kā shor hai aalam meñ haiñ hamīñ
ye husn ham haiñ jis kī ye sab dhuum dhaam hai

marte the jis pe ham vo faqat husn hī na thā
ye raaz ham pe aaj khulā āshiqī ke ba.ad

tire josh-e-hairat-e-husn kā asar is qadar siiñ yahāñ huā
ki na ā.īne meñ rahī jilā na parī kuuñ jalvagarī rahī

jis kī buniyādoñ meñ shab kā husn hai
aisī kaalī dhuup kā saaya huuñ maiñ

tire naġhme surūr-o-kaif meñ ai 'tāj' Dhalte haiñ
hadīs-e-husn-o-ulfat ko diloñ kā mudda.ā kar de

kyā husn ne samjhā hai kyā ishq ne jaanā hai
ham ḳhāk-nashīnoñ kī Thokar meñ zamānā hai

ye husn-o-jamāl un kā ye ishq-o-shabāb apnā
jiine kī tamannā hai marne kā zamānā hai

ḳhud husn-o-shabāb un kā kyā kam hai raqīb apnā
jab dekhiye ab vo haiñ ā.īna hai shānā hai

shabāb-o-husn-e-roz-afzūñ kā un ke kuchh ye aalam hai
ki ham sharminda-e-shauq-e-farāvāñ hote jaate haiñ

kiyā maiñ arz us ḳhurshīd-rū suuñ
tū shāh-e-husn maiñ terā gadā huuñ