Tags-Husn

tujh se hai sab ye husn-e-jahāñ mo'tabar tujh ko sajde kare kahkashāñ sar ba-sar
tū harīm-e-qamar maiñ hazīn-e-sahar tū samundar hai maiñ sāhiloñ kī havā

nikālā husn kā armān tū ne
mirī hasrat na ai dil-jū nikālī

zabān-e-hāl meñ in kī ajab latāfat hai
kisī se phūloñ kā husn-e-bayāñ nahīñ miltā

ye kah rahā hai tarannum havā kī maujoñ kā
ḳhamosh phūloñ kā husn-e-bayāñ nahīñ miltā

ye husn-o-ishq kī tafrīq ik bahāna hai
kahīñ nazar ko kahīñ dil ko āzmānā hai

ilāhī tamkanat-e-husn-o-nāz-e-husn kī ḳhair
kuchh aaj ishq kā andāz vālihāna hai

dūsrā aalam bane to ho sake taskīn-e-husn
ab hai jitnā ye to sarf-e-imtihāñ ho jā.egā

aañkh se mujh ko bulātā nahīñ vo qulzum-e-husn
chashm-e-girdāb se kartā hai ishāre dariyā

jalva-e-ishq haqīqat thī husn-e-majāz bahāna thā
sham.a jise ham samjhe the sham.a na thī parvāna thā

jahāñ se kuchh na mile husn-e-māzarat ke sivā
ye aarzū usī chaukhaT pe shab guzārtī hai

jaao naḳhvat tumheñ mubārak ho
husn vāloñ kā kaal thoḌī hai

ik vahī ḳhush-jamāl thoḌī hai
husn vāloñ kā kaal thoḌī hai

tire husn kī kahānī mirī chashm-e-tar se niklī
maiñ na ashk-bār hotā to na āshkār hotā

ham apnā ishq chamkā.eñ tum apnā husn chamkāo
ki hairāñ dekh kar aalam hameñ bhī ho tumheñ bhī ho

in husn kī galiyoñ meñ ḳharīdār bahut haiñ
lagtā hai shab-o-roz ye bāzār-e-mohabbat

pukārā apnā gadā kah ke mujh ko ai shah-e-husn
faqīr huuñ tire dar kā 'vazīr' naam nahīñ

dam-ba-dam us ruḳh pe ik husn-e-digar paatā huuñ maiñ
har nigāh-e-shauq ko pahlī nazar paatā huuñ maiñ

na kisī meñ husn-e-hayā rahā na kisī meñ bū-e-vafā rahī
abhī dosh-e-aql pe sar-basar koī dev-e-makr savār hai

na rumūz-e-ishq se bā-ḳhabar na mizāj-e-husn se āgahī
ye mazāq-e-rāmish-o-rañg bhī rah-e-rāstī se farār hai

tire husn-e-sajda-navāz kā ye karam jabīn-e-niyāz par
ki mile haram hī haram mujhe maiñ jahāñ jahāñ se guzar gayā