Tags-Ijazat

faisla bichhaḌne kā kar liyā hai jab tum ne
phir mirī tamannā kyā phir mirī ijāzat kyuuñ

bahut ham se gurezāñ ye zamīn o āsmāñ haiñ
ijāzat ho to ik duniyā na.ī ābād kar duuñ

chāñdnī aap kī āñkhoñ meñ bhalī lagtī hai
ho ijāzat to zarā umr bitānī thī hameñ

kyuuñ har ek moḌ pe rokā hai talāshī ke liye
kyuuñ mujhe ghar se nikalne kī ijāzat na milī

band kamre meñ ye dastūr kahāñ se aayā
kyuuñ mujhe ḳhud se bhī milne kī ijāzat na milī

yaar hotā baaġh hotā aise gar hote nasīb
mai-kashī kī mohtasib se maiñ ijāzat māñgtā

havā-e-shab bhī hai ambar-afshāñ uruuj bhī hai mah-e-mubīñ kā
nisār hone kī do ijāzat mahal nahīñ hai nahīñ nahīñ kā

ijāzat māñgtī hai duḳht-e-raz mahfil meñ aane kī
mazā ho shaiḳh-sāhib kah uTheñ be-iḳhtiyār aa.e

baḌī shiddat se jiinā chāhtī thī
magar ab ye ijāzat mil na jaa.e

chūmā thā maiñ ne jis ko, ijāzat kī ek shaam
us kākul-e-siyah kā bahut ehtimām ho

aap ne ahd kiyā hai mirī ġham-ḳhvārī kā
ab ijāzat ho to ye ahd mujhe yaad rahe

suneñge tab butān-e-hind apnī
ijāzat jab unheñ shaitān degā

tamām agle zamānoñ ko ye ijāzat hai
hamāre ahd-e-guzishta se istifāda kareñ

tire dar se bhī nibāhe, dar-e-ġhair ko bhī chāhe
mire sar ko ye ijāzat kabhī thī na hai na hogī

hoñ bāryāb-e-bazm vo saa.at kab aa.egī
muddat guzar chukī hai ijāzat liye hue

āñkheñ phoḌ us kī jo dekhe be-ijāzat muñh tirā
shauq se ai mast jām-e-sharbat-e-dīdār toḌ

na ho barham jo bosa be-ijāzat le liyā maiñ ne
chalo jaane do betābī meñ aisā ho hī jaatā hai

hamāre shahr meñ aane kī sūrat chāhtī haiñ
havā.eñ bāryābī kī ijāzat chāhtī haiñ

hai ijāzat aap to mashk-e-sitam farmā.iye
ham ġharīboñ kā kaleja bā-ḳhudā faulād hai

mai ne kiyā hai husn-e-ḳhud-ārā ko be-hijāb
ai shauq! haañ ijāzat-e-taslīm-e-hosh hai