Tags-Iltija

kamāl ye hai ki duniyā ko kuchh pata na lage
ho iltijā bhī kuchh aisī ki iltijā na lage

laakh milne kā ek milnā hai
ki hameñ izn-e-iltijā na milā

le jaa.eñ apnī be-hunaroñ pās-e-iltijā
rakhte haiñ log is liye kasb-e-hunar aziiz

jahāñ ke sab ranj-o-ġham miTā de mire muqaddar ko phir jagā de
ilāhī 'ḳhushtar' kī iltijā ye mudām terī janāb meñ hai

banegī baat bhalā kis tarah vahāñ 'ma.asūm'
anā kā rañg jahāñ iltijā meñ shāmil hai

iltijā ek muqaddar do the
ġhair kī maanī na maanī merī

bahan kī iltijā maañ kī mohabbat saath chaltī hai
vafā-e-dostāñ bahr-e-mashaqqat saath chaltī hai

karam un kā ḳhud hai baḌh kar mirī hadd-e-iltijā se
mujhe sū-e-zan nahīñ hai ki duā karūñ ḳhudā se

jism ko dard meñ hañsne kā hunar aatā hai
iltijā ye hai ki patthar meñ na Dhālo mujh ko

rañg lā.egī iltijā merī
sun hī legā kabhī ḳhudā merī

na aayā minnatoñ se yaar jis dam
to phir kyā kyā ajal ke iltijā kī

na-jāne kaun se yūsuf kā jalva mujh meñ pinhāñ hai
zuleḳhā aaj tak kartī hai 'muztar' iltijā merī

shanāḳht jis se zamāne meñ aadmī kī hai
ye iltijā hai ki tū mujh ko vo ḳhudī denā