Tags-Iltija

vo iltimās-e-lazzat-e-be-dād huuñ ki maiñ
teġh-e-sitam ko pusht-e-ḳham-e-iltijā karūñ

yār-e-be-mehr se gila bhī hai
us se masrūf-e-iltijā bhī haiñ

mire shauq kī haiñ vahī zideñ abhī lab pe hai vahī iltijā
kabhī is jale hue tuur par mujhe phir bulā ke bhī dekh le

ġhurūr-e-husn ko mānūs-e-iltijā karte
vo ham nahīñ ki jo ḳhud-dāriyāñ fanā karte

zabāñ se kuchh na kahā vo samajh gayā lekin
mirī nigāh meñ thā harf-e-iltijā koī

iltijā kī Tahniyāñ hotī nahīñ haiñ kyuuñ harī
kyuuñ samar merī duā meñ ai ḳhudā lagtā nahīñ

lutf kī un se iltijā na kareñ
ham ne aisā kabhī kiyā na kareñ

ilāhī tere karam se mile mai o ma.ashūq
ab iltijā hai barastī huī ghaTā ke liye

bas ek diid bhar kā hai phir to ye vaqfa-e-hayāt
un ke qarīb jā magar āñkhoñ kī iltijā na maan

ishq meñ shikva kufr hai aur har iltijā harām
toḌ de kāsa-e-murād ishq gadāgarī nahīñ

ye iltijā duā ye tamannā fuzūl hai
sūkhī nadī ke paas samundar na jā.egā

shikva-sanjī ne ḳhulūs--e-iltijā kam kar diyā
kuchh shikāyat bhī zabāñ par thī munājātoñ ke biich

ban ga.ī hai vo iltijā aañsū
jo nazar meñ samā na paa.ī hai

vo ibtidā-e-mohabbat vo ehtiyāt-e-kalām
banā.e jaate the alfāz iltijā ke liye

vo jaan kar mujhe tanhā mirī nahīñ sunte
kahāñ se lā.ūñ zamāne ko iltijā ke liye

janāb-e-'mohsin'-e-ehsāñ se iltijā hai ki vo
pahuñch ga.e haiñ sar-e-āb to vuzū kiye jaa.eñ

iltijā hī iltijā baaqī hai shikva ho chuke
ab mohabbat tum se karte haiñ parastārāna ham

thā bhī zalīl husn kī sarkār meñ ye dil
kam-baḳht ko supurd huā iltijā kā kaam

maiñ tujh se dūriyoñ kī talabgār huuñ magar
ye iltijā bhī hai ki mujhe duur tū na kar

ruuh kī baat sune jism ke tevar dekhe
iltijā hai ki vo is aag meñ jal kar dekhe