Tags-Iltija

ret-o-sāhil meñ sulh phir na huī
thak ga.ī mauj iltijā kar ke

ishq meñ shikva kufr hai aur har iltijā harām
toḌ de kāsa-e-murād ishq gadāgarī nahīñ

jahāñ tauhīn-e-arz-o-iltijā ho
vahāñ par arz kaisī iltijā kyā

iltijā dohrā rahā huuñ phir vo 'josh'
jo hai lākhoñ baar dohrā.ī huī

tū bhī fariyādī huā thā iltijā maiñ ne bhī kī
tū na thā mujrim akelā haañ ḳhatā maiñ ne bhī kī

kyuuñ na karam ke vāste aap se iltijā karūñ
aap batā.eñ kyā mujhe aap kā aasrā nahīñ

jab un se adab ne na kuchh muñh se māñgā
to ik paikar-e-iltijā ho ga.e ham

zavāl-e-asr hai kuufe meñ aur gadāgar haiñ
khulā nahīñ koī dar bāb-e-iltijā ke sivā

pashmīna-posh rāh-nashīnoñ kī iltijā
shāyad kabhī vo shāhid-e-atlash-qabā sune

māne-e-arz mujh ko pās-e-vafā
un ko zid iltijā kare koī

kyā ġhazab hai iltijā par maut bhī aatī nahīñ
talḳh-kāmī par hamārī zahr mīThā ho gayā

kisī kā ehsān ham na leñge kisī ko taklīf kuchh na deñge
ḳhudā ne paidā kiyā hai ham ko ḳhudā hī se iltijā kareñge

hamārī ḳhair manāo ki aaj ḳhud us ne
baḌe ḳhulūs baḌī iltijā se bāteñ kiiñ

sab ko hurūf-e-iltijā ham nazr kar chuke
dushman to mom ho ga.e patthar vahī rahā

tāq-e-abrū-e-yār ko dekhūñ
ain ka.abe meñ iltijā hai ye

lafz-o-ma.anī se māvarā huuñ maiñ
ek ḳhāmosh iltijā huuñ maiñ

dil ḳhatā-vār-e-ishtiyāq sahī
lab gunahgār-e-iltijā na huā

'bahr' shākir raho muqaddar par
kas-o-nā-kas se iltijā na karo

laa.e us but ko iltijā kar ke
kufr TuuTā ḳhudā ḳhudā kar ke

ḳhudā kī bhī nahīñ sunte haiñ ye but
bhalā maiñ kyā huuñ merī iltijā kyā