Tags-Iltija

sirf ik iltijā hai chhoTī sī
kyā use bāryāb karte ho

kyuuñ shauq meñ girā.iye saath apne shān-e-ishq
aġhmāz bhī zarūr hai kuchh iltijā ke saath

yārab ġhalat ho fahm-e-kaj-andesh kā gumāñ
kuchh kah rahā hai in se adū iltijā ke saath

baat khote jo iltijā karte
ai dil-e-nā-murād kyā karte

iltijā kā malāl kyā kiije
un ke dar par kahīñ paḌī hogī

mirī iltijā hai tujh se mirī bandagī badal de
ki tire karam mirī jaañ mirī lau lagī huī hai

tujh se milne kī iltijā kaisī
hoñT par aa ga.ī duā kaisī

vasl kī bhī duā nahīñ hotī
ham se ab iltijā nahīñ hotī

vo banānā chehra itaab kā vo na denā muñh se javāb kā
vo kisī kī minnat o iltijā tumheñ yaad ho ki na yaad ho

iltijā nāz-āfrīnī ke liye hai varna sun
aarzū ḳhud us kī shāhid hai ki jalva dil meñ hai

us kī baat aur hai, varna ai 'iftiḳhār'
us ko ma.alūm hai, iltijā aur maiñ

nādān mā-sivā se na kar iltijā na maañg
māñge ḳhudā se bhī to ḳhudā ke sivā na maañg

maiñ reza reza badan kā uThā rahā huuñ 'adīm'
vo toḌ hī to gayā apnī iltijā se mujhe

chāragarī kī jab bhī kī zaḳhmoñ ne iltijā
hañs kar faqīr ne ye kahā mutma.in raho

chaah kī tum se iltijā kī hai
ham ne kitnī hasīñ ḳhatā kī hai

iltijā hai ijz-o-usrat kun-fakānī aur hai
guftugū-e-be-samar mojiz-bayānī aur hai

yahī bas 'akbar' kī iltijā hai janāb-e-bārī meñ ye duā hai
ulūm-o-hikmat kā dars un ko professor deñ samajh ḳhudā de

chale bhī aao ki duniyā se jā rahā hai koī
suno ki phir na sunoge tum iltijā merī

nahīñ mumkin ki tujh ko rahm aa.e
vo maiñ kyā aur merī iltijā kyā

zabāñ se 'tābāñ' mat kaho nazar se iltijā karo
zabāñ kī baat aur hai nazar kī baat aur