Tags-Iltija

ga.ī javānī to jaa.e dilbar mujhe hai ulfat hanūz baaqī
vo iltijā bhī nahīñ ga.ī hai vo justujū bhī nahīñ ga.ī hai

duā ke ba.ad bhī ye iltijā hai
ziyāda kah gayā ab kuchh samajh le

ye pichhlī raat ye ḳhāmoshiyāñ ye Dūbte taare
nigāh-e-shauq bahkī phir rahī hai iltijā ho kar

ik iltijā thī āñkhoñ meñ pathrā ke rah ga.ī
ik aks sañg-e-dar pe khaḌā thā so ḳhvāb thā

niyāz-o-ijz hī me.arāj-e-ādamiyyat haiñ
baḌhāo dast-e-saḳhāvat bhī iltijā kī tarah

ḳhudā kī bhī nahīñ sunte haiñ ye but
bhalā maiñ kyā huuñ merī iltijā kyā

aa ke baiThe saath jab kī iltijā
aap kā jo hukm ho mangvāoñgā

maiñ ik ġharīb-e-be-navā maiñ ik faqīr-e-be-sadā
mirī nazar kī iltijā jo pā sako to saath do

vo hai ba-zid usī pe ki maiñ iltijā karūñ
kuchh to batā ai merī anā ab maiñ kyā karūñ

maut bhī aa sakī na muñh-māñgī
aur kyā iltijā kare koī

zavāl-e-asr hai kuufe meñ aur gadāgar haiñ
khulā nahīñ koī dar bāb-e-iltijā ke sivā

baġhair kuchh kahe maiñ ne palaTne kā sochā
aur ek phuul dar-e-iltijā pe chhoḌ diyā

dopahar maidān garmī habs abr-e-be-matā
sar-nigūñ hai ḳhār-o-ḳhas par ik gul-e-fīroza-fām

qubūl vo jise kartā vo iltijā nahīñ kī
duā jo vo na kare mustarad nahīñ māñgī

himmat-e-iltijā nahīñ baaqī
zabt kā hausla nahīñ baaqī

koī hausla hai na mudda.ā koī aarzū hai na iltijā
mire dil meñ ik tirī yaad hai mire lab pe ik tirā naam hai

un kī bātoñ ko yaad kartā huuñ
jo mirī iltijā ko bhuul ga.e

siyāh raat hai mahtāb ban ke aa jaao
ye 'indirā' ke laboñ par hai iltijā sāhab

hazār minnateñ kiiñ laakh haath phailā.e
milā na kuchh bhī magar zaḳhm-e-iltijā ke sivā

ye faḳhr kam nahīñ fāriġh hai dil ġharīb to kyā
ki aabrū to nahīñ khoī iltijā kar ke