Tags-Jabr

har aadmī hai yahāñ jabr-o-iḳhtiyār ke saath
magar ye dekh kisī kā kisī pe zor bhī hai

haañ to maiñ aap se kahtā thā janāb
zindagī jabr kī pāband nahīñ rah saktī

kabhī jabr-o-sitam ke rū-ba-rū sar ḳham nahīñ hotā
mirā jazb-e-sadāqat ġhair-mustahkam nahīñ hotā

go sarāpā-e-jabr haiñ phir bhī
sāhab-e-iḳhtiyār haiñ ham log

ye jabr-e-siyāsat ye insāñ mazlūm aaheñ majbūr fuġhāñ
zaḳhmoñ kī mahak dāġhoñ kā dhuāñ mat pūchh fazā-e-zindāñ meñ

khā.egā shikast ik din sabr-o-zabt-e-paiham se
dard kā tasalsul aur jabr kā haTīlā-pan

jo ham pe aisā na kār-e-duniyā kā jabr hotā
to ham bhī rahte yahāñ junūñ iḳhtiyār kar ke

ba-zauq-e-sher ba-jabr-e-ma.āsh yakjā haiñ
mire uruuj kī rāteñ mire zavāl ke din

ālam-e-jabr meñ quvvat kā taḳhayyul thā bahut
ab vo quvvat hai ki majbūr huā jaatā huuñ

hai jabr vaqt kā qissa ajab sunā.e kaun
maiñ yaad us ko karūñ aur yaad aa.e kaun

jabr se ek huā zā.eqa-e-hijr-o-visāl
ab kahāñ se vo mazā sabr ke phal meñ aa.e

rahe dil pe ai zamāne tirā zor-o-jabr kab tak
kyā faqat tirā ḳhudā thā kyā mirā ḳhudā nahīñ thā

kahā maiñ us but-e-abrū-kamāñ kī ḳhidmat meñ
ḳhadañg-e-jabr ne tere kiyā hai mujh ko nigār

ḳhud apnī lauh-e-tamannā pe khil ke dekhūñgā
kisī ke jabr ne likkhā thā rā.egāñ mujh ko

kaisī mushkil meñ phañsāyā hai mohabbat ne mujhe
baiThnā jabr hai aur tāqat-e-raftār nahīñ

kasrat-e-āzār ne ta.alīm de dī zabt kī
jabr ke baa.is se dil ko sabr karnā aa gayā

jabr-o-istihsāl ke is ātishīñ sailāb meñ
bah ga.e insāniyat ke lahlahāte barg-o-bār

jabr zauq-e-nazar pe karte rahe
husn ko be-hijāb kyā karte

mutrib se pūchh mas.ala-e-jabr-o-iḳhtiyār
kyā taal sam pe uThte haiñ be-iḳhtiyār haath

ik aur ma.arka-e-jabr-o-iḳhtiryār sahī
ik aur lamha-e-tāza guzār jā.ūñ maiñ