Tags-Jabr

jabr-o-zulmat kī is ḳhudā.ī meñ
jaane kin kin pe kyā karam hoñge

ham-ḳhayāloñ ke mashraboñ kā zavāl
ḳhauf se jabr se talab se hai

un ke sitam bhī sah ke na un se kiyā gila
kyuuñ jabr iḳhtiyār kiyā haa.e kyā kiyā

zindagī jabr hai aur jabr ke āsār nahīñ
haa.e is qaid ko zanjīr bhī darkār nahīñ

havā kā jabr kahīñ biich meñ thamā hī nahīñ
tirī galī bhī bahut dil dukhā ke chhoḌī hai

josh-e-ulfat meñ aur zabt ai dil
jabr par iḳhtiyār kyā kahnā

dil dukhoñ ke hisār meñ aayā
jabr kab iḳhtiyār meñ aayā

tirī baḳhshī huī ḳhil.at pahan kar
mujhe har jabr palte dekhnā hai

mohabbat kahāñ ye to bechārgī hai sitam bhī saheñ phir karam is ko samjheñ
ye jabr is liye kar liyā hai gavārā ki is ke sivā koī chārā na dekhā

har saañs se dars-e-aman diyā har jabr pe dād-e-ulfat dī
qātil ko bhī gar lab hil na sake āñkhoñ se duā-e-rahmat dī

kyā balā jabr-e-asīrī hai ki āzādī meñ bhī
dosh par apne liye phirte haiñ zindāñ-ḳhana ham

'dāġh' tū dekh to kyā hotā hai
jabr par sabr kiyā karte haiñ

jabr-e-hālāt kaho ġham kī mukāfāt kaho
TuuT bhī jaatā hai hoñToñ se navā kā rishta

is jabr-e-mashiyyat ko to sahnā hī paḌegā
be-kaif sahī un ke ishāroñ pe jiye jā

ye jabr zīst-e-mohabbat pe kab talak āḳhir
ki dil salām kareñ aur nazar na pahchāne

ye hai jabr-e-mashiyat yā mirī taqdīr hai yārab
sahārā jis kā letā huuñ usī se kuchh nahīñ hotā

ḳhizāñ kā jabr to siine pe rok lete haiñ
hameñ udaas bahāroñ se ḳhauf aatā hai

maiñ jañg jiit ke jabr-o-anā kī haar gayā
adū pe rahm kā ehsās mujh ko maar gayā

paar karnā hai mujhe dariyā-e-jabr-e-vaqt ko
kaam aisā hai ki jaldī meñ use karnā nahīñ

sitam to ye hai ki is ahd-e-jabr meñ bhī yahāñ
malūl hai na koī be-qarār hai, kyā hai