Tags-Jabr

ye jabr-e-māh-o-sāl meñ ghirī huī zamīñ mirī gavāh hai
nashāt kī abad-kanār manziloñ meñ ek umr se maiñ un karīm aur jamīl sā.atoñ kā muntazir huuñ

zarā se jabr se maiñ bhī to TuuT saktī thī
mirī tarah se tabī.at kā vo bhī saḳht na thā

junūñ pe jabr-e-ḳhirad jab bhī hoshyār huā
nazar ke saath nazāra bhī sharm-sār huā

uThī chāroñ taraf se jab ki zulm-o-jabr kī āñdhī
payām-e-amn le kar aa ga.e rūh-e-zamāñ gāñdhī

chalī bād-e-jabr agar to kyā mujhe yuuñ jahāñ na bujhā sakā
mujhe raas aa.ī yahī huā mirā sho.ale aur bhaḌak ga.e

matā-e-amn luTā.eñge ham zamāne meñ
nizām-e-jabr-o-tashaddud kuchal ke dam leñge

ḳhalā-e-jāñ kā safar aur phir tan-e-tanhā
ye rāsta bhī baḌe jabr o iḳhtiyār kā hai

deñ dīda-e-ḳhush-ḳhvāb ko ta.abīr kahāñ tak
ai vaqt tire jabr kī tauqīr kahāñ tak

huā kahāñ abhī sadiyoñ ke jabr se āzād
ḳhudā.ī par jo bashar iḳhtiyār māñge hai

do chaar baras jitne bhī haiñ jabr hī sah leñ
is umr meñ ab ham se baġhāvat nahīñ hotī

na karte jabr kisī par bhī log phir shāyad
jo iḳhtiyār pe apne nigāh kar lete

is jabr-o-iḳhtiyār se pāmāl maiñ bhī huuñ
ai rūh-e-ehtijāj batā kyā ḳhayāl hai

mirī sham-e-nūr ke us taraf mirī ḳhāk-e-sabz ke is taraf
ye na.ī zamīn hai jabr kī ye nayā gulāb hai sabr kā

mirī sub.h-e-ḳhvāb ke shahr par yahī ik javāz hai jabr kā
ki mire vajūd ke baaġh meñ abhī koī phuul hai sabr kā

har dam jihād-e-nafs meñ takbīr hai buland
sar par hai teġh-e-jabr magar hai bapā namāz

asā-e-sabr se rasta banā liyā ham ne
kabhī jo raah meñ dariyā-e-jabr aayā hai

yahī hai maslahat-e-jabr-e-ehtiyāt to phir
ham apnā haal kaheñge chhupā ke lahje meñ

aqallīyat kahīñ kī ho tah-e-ḳhanjar hī rahtī hai
halākat-ḳhez hāthoñ ke hazāroñ jabr sahtī hai

ye jabr dekho ki rahnā bhī hai sar-e-maqtal
har ek vaar bhī sahnā hai sar bhī rakhnā hai

sitam hai dil ke dhaḌakne ko bhī qarār kaheñ
tumhāre jabr ko apnā hī iḳhtiyār kaheñ