Tags-Jabr

jabr hassās tabī.at par agar bojh bane
habs-ābād meñ fankār nahīñ rah saktā

ye muḳhtasar sī dāstāñ hai jabr-o-iḳhtiyār kī
karishma-sāz koī ho ḳhatā gunāhgār kī

maiñ huuñ bhī aur nahīñ bhī ajiib baat hai ye
ye kaisā jabr hai maiñ jis ke iḳhtiyār meñ huuñ

jiinā hai to ye jabr bhī sahnā hī paḌegā
qatra huuñ samundar se ḳhafā ho nahīñ saktā

vo rabt tum se baḌhā.eñ vo tum ko yaar kareñ
hazār tarah ke jo jabr iḳhtiyār kareñ

sab jāntā huuñ hazrat-e-nāseh pa kyā karūñ
dil par karūñ maiñ jabr agar iḳhtiyār ho

kab tak misāl-e-dasht saheñ mausamoñ kā jabr
ḳhvāboñ kā koī shahr basā lene dījiye

zabān-e-haq kisī ke jabr se bhī ruk nahīñ saktī
ki neze kī anī par bhī Tañge sar bol uThte haiñ

ye kis kī pyaas ke chhīñTe paḌe haiñ paanī par
ye kaun jabr kā qissa tamām kar aayā

tā.at-e-jabr bahut aam huī jaatī thī
ek inkār ne kī rasm-e-baġhāvat zinda

balā-e-jabr bhī hai pā-e-iḳhtiyār bhī hai
qusūr-vār huuñ maiñ yā sadā-e-kun-fayakūñ

phir jabr-o-sitam ke saa.e meñ kuchh log ḳhudā ban baiThe haiñ
muusā hī nahīñ haiñ ab varna fir.aun bhī hai aur tuur bhī hai

jabr ke baab meñ farozāñ haiñ
hāsil-e-iḳhtiyār haiñ ham log

hisār-e-jabr se mumkin najāt thī lekin
jhukā ke sar na kisī tañg baab se nikle

kis jabr kā narġha hai madīne kī riyāsat
ḳhāmosh hai kyoñ kyā hai koī ahd-e-yazīdī

hai jabr meñ bhī ek gumāñ iḳhtiyār kā
do chaar har qadam pe hoñ ik imtihān se

roz-e-fariyād se maġhlūb nahīñ tāqat-e-shukr
jabr-e-taqdīr-e-girāñ bārī-e-ġham kuchh bhī nahīñ

darūn-e-zāt kisī kā ye jabr hai mujh par
usī ko jaan usī ko jigar banāyā jaa.e

ye mirā ehsās hai yā jabr-e-mausam kā asar
ab kī rut mahke nahīñ gul pichhle sāloñ kī tarah

maiñ kisī jabr ke hisār meñ huuñ
ik safar hai rukā huā mujh meñ