Tags-Jafa

ai ahl-e-vafā dād-e-jafā kyuuñ nahīñ dete
so.e hue zaḳhmoñ ko jagā kyuuñ nahīñ dete

ab āsmāñ se mujhe shikva-e-jafā bhī nahīñ
har inqalāb mire hasb-e-hāl hone lagā

terī jafā na ho to hai sab dushmanoñ se amn
badmast ġhair mahv dil aur baḳht ḳhvāb meñ

is nazākat par ye shamshīr-e-jafā
aap se kyūñkar sambhālī jā.egī

phir le chalā hai kal mujhe kyuuñ bazm-e-yār meñ
ījād us ne kyā koī tarz-e-jafā kiyā

jafā ko bhī vafā samjho ki 'hasrat'
tumheñ haq un se kyā chūn-o-charā kā

uThāveñ nāzāñ ke ham na kyūñkar 'nazīr' dil se ki jin ke hoveñ
jafā talattuf itaab shafqat ġhazab tavajjoh hatam navāzish

uThā lene se to dil ke rahā maiñ
tū ab zālim vafā kar yā jafā kar

tirī jafā kā ḳhudā silsila darāz kare
ki us se apnā ta.alluq bhī gaah gaah kā thā

kyuuñ dajla-o-furāt ke da.ave ki nahr par
tishna-dahan shahīd-e-jafā ham hue ki tum

karte hī nahīñ tark-e-butāñ taur-e-jafā kā
shāyad hamīñ dikhlāveñge dīdār ḳhudā kā

mohabbat meñ jafā kyā hai vafā kyā
vo ye pūchheñ to shikvoñ kā mazā kyā

mujh ko tirī jafā kā to shikva nahīñ magar
aatī hai yuuñ hī lab pe shikāyat kabhī kabhī

bastī meñ kamī kis chiiz kī hai patthar bhī bahut shīshe bhī bahut
is mehr o jafā kī nagrī se dil ke haiñ magar rishte bhī bahut

ghuur lete the jafā-kāroñ ko jab maftūñ na the
ho ga.e chaurañg ḳhud chañgez-ḳhānī ab kahāñ

hazār baar husn ḳhud hī nādim-e-jafā huā
agarche ishq ne bhī kiiñ shikāyateñ kabhī kabhī

jā.iye jā.iye mat dekhiye muḌ kar pīchhe
aise shauqīn-e-jafā ḳhār-e-vafā ham bhī nahīñ

ye ahd vo hai ki merī vafā ke qissoñ meñ
tirī jafā kī hikāyāt bhī bayāñ hoñgī

gar jafā kī na ho vafā maan.e
koī zālim nahīñ tirā maan.e