Tags-Jafa

vo tabassum bhī qayāmat hai tirā bād-e-jafā
tū ne dī ho jise ḳhidmat namak-afshānī kī

har harf meñ saḳhtī hai tire sañg-e-jafā se
Dartā huuñ na phir shīsha-e-dil chuur ho ai shaiḳh

vāraftgān-e-shauq kā shikva sune baġhair
gulshan supurd-e-ahl-e-jafā kar diyā gayā

ai aql aur hogā koī us kī shakl kā
dil kaise maan le vo jafā meñ lagā rahā

yuuñ mujh pe jafā hazār kiijo
par ġhair ko to na pyaar kiijo

hameñ bhī sabr ḳhātir-ḳhvāh dād-e-haq hai ulfat meñ
vo de jaur o jafā kī daad jitnā us kā jī chāhe

bahut kaḌā hai mohabbat ke rāstoñ kā safar
jafā kī dhuup chhupī hai vafā kī chhāñv meñ

kyā vafā o jafā kī baat kareñ
darmiyāñ ab to kuchh rahā bhī nahīñ

ek ehsān hai qudrat kī jafā-kārī par
us kī duniyā meñ bhī jiine kī tamannā karnā

mohabbat ke jogī sitam ke birogī vafā ke bhikārī jafā ke pujārī
jahāñ dekh paate haiñ jalva butoñ kā bichhāte haiñ apnā vahīñ mirg-chhālā

ham ko ḳhud arz-e-tamannā kā salīqa bhī na thā
vo bhī 'tanvīr' bhalā uzr-e-jafā kyā karte

vāqif kab thā pyaar se pahle lekin 'zākir' pyaar ke ba.ad
qismat rekhā husn-o-adā aur nāz-o-jafā sab jaan liyā

guzarne ko to kāj-o-vākaj apnī guzre hai
jafā jo un ne bahut kī to kuchh vafā kam kī

mirī vafā ke sivā ġhāyat-e-jafā kyuuñ ho
tirī jafā ke sivā hāsil-e-vafā ma.alūm

is jafā par tumheñ tamannā hai
ki mirī iltijā kare koī

muñh lagāte hī 'dāġh' itrāyā
lutf hai phir jafā kare koī

ham par jafā se tark-e-vafā kā gumāñ nahīñ
ik chheḌ hai vagarna murād imtihāñ nahīñ

mutma.in garmī-e-ehsās-e-jafā se bhī nahīñ
dil ko pahuñche bhī to ārām kahāñ tak pahuñche

maiñ nikal ke bhī tire daam se na girūñgā apne maqām se
maiñ 'qatīl'-e-teġh-e-jafā sahī mujhe tujh se ishq zarūr hai

diloñ ko lūTne vaalī adā bhī yaad nahīñ
vafā kā zikr hī kaisā jafā bhī yaad nahīñ