Tags-Jafa

abhī ye jafā kā hai āġhāz ai dil
vafā ke abhī imtihāñ aur bhī haiñ

uThā le haath jafā-o-sitam se ai zālim
ḳhudā ke paas bhī is se baḌā salām nahīñ

tujh se kuchh dekhā na ham ne juz jafā
par vo kyā kuchh hai ki jī ko bhā gayā

mirī jafā-talabī kā ḳhayāl hai us ko
vagarna pyaar kā andāz dūsrā bhī hai

daur-e-āġhāz-e-jafā dil kā sahārā niklā
hausla kuchh na hamārā na tumhārā niklā

un nigāhoñ meñ hai shikāyat sī
ishq shāyad jafā-shi.ār bhī hai

kaise qātil haiñ jinheñ pās-e-vafā hai na jafā
qatl karte haiñ to aġhyār kī talvāroñ se

sambhal sambhal ke mire dil ko toḌne vaale
tirī jafā meñ mohabbat kī chāshnī to milī

ye apnī vafā kā aalam hai ab un kī jafā ko kyā kahiye
ik nishtar zahr-āgīñ rakh kar nazdīk-e-rag-e-jāñ bhuul ga.e

taġh.īr vaz.a kī hai ishāra vidā kā
yaanī jafā pe ḳhūgar-e-altāf kab rahā

ab kaun kare roz na.ī un se shikāyat
achchhā chalo taslīm jafā-kār hamīñ haiñ

jis kī fitrat hai jafā aur sitam hai sheva
hai vahī dil kā nigahbān ḳhudā ḳhair kare

shāyad yahī kitāb-e-mohabbat ho lā-javāb
merī vafā ke saath hai terī jafā bahut

apnā lahū yatīm thā koī na rañg lā sakā
munsif sabhī ḳhamosh the uzr-e-jafā ke sāmne

uThā lene se to dil ke rahā maiñ
tū ab zālim vafā kar yā jafā kar

kitnī sudhar ga.ī hai judā.ī meñ zindagī
haañ vo jafā se mujh pe to ehsān kar gayā

mohabbateñ bhī rifāqateñ bhī adāvateñ aur nadāmateñ bhī
mirā asāsa maiñ jāntī thī kahāñ vafā thī kahāñ jafā thī

'nātiq' gila-pasand hai tū ġham-jafā-pasand
ai dād-ḳhvāh kaam hai be-dād-ḳhvāh kā

jafā kī us se shikāyat zarā nahīñ aatī
vo yaad hī hameñ shukr-e-ḳhudā nahīñ aatī

shukr us kī jafā kā ho na sakā
dil se apne hameñ gila hai ye