Tags-Jafa

uThā.e sau tarah ke zulm aur jaur-o-jafā tere
kahā shābāsh bhī tū ne na merī istaqāmat ko

thā jigar to TukḌe TukḌe bar meñ kyuuñ taḌpe hai tū
kyuuñ dilā teġh-e-jafā se tū bhī bismil kyā huā

kaisā ġhazab ye ai dil-e-pur-josh kar diyā
terī ravish ne un ko jafā-kosh kar diyā

shukriya aap ke ehsās-e-jafā kā lekin
ye karam fitna-e-āġhāz-e-jafā hai ki nahīñ

kyā ġhalat ishq ko hai jurm-e-vafā kā iqrār
husn par zahmat-e-bedād-o-jafā hai ki nahīñ

ziist meñ lamha-e-andoh-jafā hai ki nahīñ
ai mohabbat koī terī bhī ḳhatā hai ki nahīñ

kisī mahkī huī chhāñv meñ Thahar ke ham bhī
sañg-dil vaqt kā andāz-e-jafā bhuul ga.e

jafā-shi.ār bhī ho koī mehrbāñ bhī rahe
kisī ke lab pe duā.eñ bhī hoñ fuġhāñ bhī rahe

nādān ho jahāñ kā chalan dekhte nahīñ
rasm-e-jafā ko aam ba-nām-e-vafā karo

halāk-e-teġh-e-jafā yā shahīd-e-nāz kare
tirā karam hai jise jaise sarfarāz kare

hai vafā dil meñ yā jafā kyā hai
saaf kahiye ki mājrā kyā hai

vafā mirī mo'tabar hai kitnī jafā vo kar sakte haiñ kahāñ tak
jo vo mujhe aazmā rahe haiñ to maiñ unheñ aazmā rahā huuñ

charḳh kī sa.ī-e-jafā koshish nākāra hai
gardish-e-dahr yahāñ jumbish-e-gahvāra hai

'aḳhtar' na karo un se gilā jaur-o-jafā kā
apnī bhī ḳhudā jaane havas hai ki vafā hai

qatl us ne jurm-e-sabr-e-jafā par kiyā mujhe
ye hī sazā thī aise gunahgār ke liye

dast-e-taqdīr meñ shamshīr-e-jafā denā hai
ḳhud-ba-ḳhud banda-e-taslīm-o-razā ho jaanā

khañDar to shahr-e-dil andar ke zalzaloñ se huā
ye zulm terī jafā yā tirī vafā se na thā

rauñd Dālūñ paañv ke nīche tujhe
dil meñ aatā hai jafā-gar āsmāñ

socho to 'zahīr' āḳhir vo jaur to kartā hai
maiñ us se gilā kar ke mahrūm-e-jafā hotā

sitam hai ab bhī umīd-e-vafā pe jiitā hai
vo kam-nasīb ki shā.ista-e-jafā bhī nahīñ