Tags-Jafa

jafākārī hai taslīm-e-sitam bhī
na hogā tāba-e-jaur-o-jafā dil

vafā.eñ roz-e-avval se mirī tujh ko na ḳhush aa.iiñ
jafā meñ maiñ terī āḳhir huā bhar umr sah sah kar

jafā yā mehr jo chāhe so kar le apne bandoñ par
mujhe ḳhatra nahīñ hargiz burā.ī yā bhalā.ī kā

naala ruktā hai to sar-garm-e-jafā hotā hai
dard thamtā hai to be-dard ḳhafā hotā hai

mujhe kyuuñ aaj hichkī aa rahī hai
koī yaad aa.ī aur un ko jafā kyā

tum karo tark-e-jafā kyā imkān
ham kareñ tark-e-vafā kiyā baa.is

aaj bhī garm hai bāzār jafā-kāroñ kā
kal bhī ārāsta thī un kī dukāñ aaj bhī hai

jaur-o-jafā ke aise ham ho ga.e haiñ ḳhūgar
nā-meharbāniyāñ bhī ab mehrbāniyāñ haiñ

talāfī vafā kī jafā chāhtā huuñ
tumhīñ ḳhud ye kah do burā chāhtā huuñ

vaañ hai vahī vufūr-e-itāb-o-jafā-o-qahr
yaañ naaz bhī uThāne kī tāqat nahīñ rahī

yahī āshiq kā paas karte haiñ
kyuuñ jī kyuuñ dar-pa-e-jafā ho tum

vafā na kī na sahī ye bhī yaad hai tujh ko
koī jafā ko bhī tere taras rahā hogā

shikva gar kiije to hotā hai gumāñ taqsīr kā
har jafā se baab khultā hai nayā ta.azīr kā

muflis ko ahl-e-zar ne bhī kyā kiyā diye fareb
apnī jafā kā hukm-e-ḳhudā naam rakh diyā

rañgīni-e-havas kā vafā naam rakh diyā
ḳhuddāri-e-vafā kā jafā naam rakh diyā

koī shikva na shikāyat na sitam hai na jafā
ek muddat se tirī ham pe ināyat hī nahīñ

ḳhulūs-e-ta.amīr ho jo shāmil sitam kā jazba burā nahīñ hai
vafā kareñge vo kyā kisī se jinheñ shu.ūr-e-jafā nahīñ hai

tū apne sheva-e-jaur-o-jafā se mat guzre
tirī balā se mirā dam rahe rahe na rahe

gilā nahīñ hai jafā kā magar savāl ye hai
satā.eñge kise phir aap jāñ-nisār ke ba.ad