Tags-Jalwa

ban-sañvar kar ho jo vo jalva-numā koThe par
charḳh-e-chārum kā nazar aa.e samā koThe par

jo mere tañgnā-e-dil meñ tujh ko jalva-gar dekhā
mirī nazroñ ne hairat se mujhī ko umr bhar dekhā

hazār rañg the lekin thā ek hī jalva
kamāl husn kā tere javāb ho na sakā

parda-dār chehra-e-yūsuf nahīñ hai har naqāb
husn-e-lailā jalva-gar har ek mahfil meñ nahīñ

is adā se kaun ye jalva-gar sar-e-bazm-e-husn-e-ḳhayāl hai
jo nafas hai mast-e-bahār hai jo nazar hai ġharq-e-jamāl hai

tumhārā aa.ina ban kar jo dil pesh-e-nazar rahtā
tumhīñ tum jalva-gar hote na sūrat dūsrī hotī

tum jalva-numā ho to khulī haiñ mirī āñkheñ
aa lipTo badan se to maiñ chādar kī tarah huuñ

us jalva-gāh-e-husn meñ chhāyā hai har taraf
aisā hijāb chashm-e-tamāshā kaheñ jise

qalb-e-shahīd meñ hai tajallī-e-husn-e-yār
mushtāq-e-jalva kyuuñ na hoñ dil se fidā-e-qalb

kah sake kaun ki ye jalvagarī kis kī hai
parda chhoḌā hai vo us ne ki uThā.e na bane

kabhī kalīm ne dekhā thā tuur par jalva
vahī maiñ jalva-e-jānāñ talāsh kartā huuñ

aate hī us tifl ke raushan siyah-ḳhāna huā
sham.a saañ jalva hai us ke qāmat-e-kotāh kā

sab se pahle to arz matl.a hai
yuuñ samajhiye ki us kā jalva hai

phailā jo nūr-e-mahr-e-imāmat dam-e-zavāl
zarroñ se vaañ ke aañkh milānā huā muhāl

un kā jalva nahīñ dekhā jaatā
dekh dekhā nahīñ dekhā jaatā

ai zauq-e-ijz jalva-gah-e-yār hai qarīb
pā-e-talab meñ laġhzish-e-mastāna chāhiye

ġham nairañg dikhātā hai hastī kī jalva-numā.ī kā
kitne zamānoñ kā hāsil hai ik lamha tanhā.ī kā

husn-e-fitrat jalva-gar ho kar yaqīnan ik din
rañg kaliyoñ ko guloñ ko dilkashī de jā.egā

ye dil hai magar dil meñ basā aur hī kuchh hai
dil ā.īna hai jalva-numā aur hī kuchh hai

phir 'razā' jalva-numā hotā hai
man ke andhoñ ko nazar de denā