Tags-Jawani

javānī bhaTaktī hai bad-kār ban kar
javāñ jism sajte haiñ bāzār ban kar

maiñ shurūa se zindagī meñ dhartī kā bojh thā
maiñ ne javānī kirm-e-kitābī ban ke guzārī hai

yuuñ to sadiyāñ guzar ga.iiñ 'qaisar'
dil ke sadme tirī javānī vahī

dikhā.ī dene lagā vo ik tīsrā kināra
abhī javānī ko paar maiñ ne nahīñ kiyā thā

zamāna badlā miTī javānī na vo mohabbat na zindagānī
bas ek bholī sī yaad hai jo ba-rañg-e-dāġh-e-kuhan hai baaqī

agar taḳh.īl-e-sarsayyad hai ab guldasta-e-māzī
javānī kī umañgoñ ko na.ī añgḌā.iyāñ de de

piirī meñ 'riyāz' ab bhī javānī ke maze haiñ
ye rīsh-e-safed aur mai-e-hosh-rubā surḳh

ab sitāroñ meñ javānī nahīñ raqsāñ koī
chāñd ke nuur meñ naġhmāt ke sailāb nahīñ

piirī meñ kyā javānī ke mausam ko roiye
ab sub.h hone aa.ī hai ik dam to soiye

maiñ pal do pal kā shā.ir huuñ pal do pal mirī kahānī hai
pal do pal merī hastī hai pal do pal mirī javānī hai

qasam is aag aur paanī kī
maut achchhī hai bas javānī kī

mahñgā.ī meñ har ik shai ke daam hue haiñ duune
majbūrī meñ bike javānī do kauḌī ke mol

ham ne to ḳhud ''qubūl'' kahā thā ḳhushī ḳhushī
ab tak hai ġham ki ain-javānī meñ phañs ga.e

ḳhuub hī rañg-e-javānī sheb ne khoyā 'habīb'
mahv dil se bhī ḳhayāl-e-rū-e-jānāna huā

jaan hai mol us kā ai ishq-e-javānī jaan le
naqd husn-e-yūsuf-sānī kā bai.āna huā

ye mohabbat kī javānī kā samāñ hai ki nahīñ
ab mire zer-e-qadam kāhkashāñ hai ki nahīñ

bikhrī thī har samt javānī raat ghanerī hone tak
lekin maiñ ne dil kī na maanī raat ghanerī hone tak

ik sweater ne baḌhā dī thī javānī merī
tum ne mere liye ik ḳhvāb bunā thā pahle

nemat milī hai tum ko javānī kī dosto
afsos hai ki azm tumhārā javāñ nahīñ

ai mire hindostāñ jannat-nishāñ
terī mastāna havāoñ meñ javānī zau-fagan