Tags-Jawani

dil ko afsos-e-javānī hai javānī ab kahāñ
koī dam meñ chal baseñge zindagānī ab kahāñ

ham sab ko batāte rahte haiñ ye baat purānī kaam kī hai
das biis gharoñ meñ charche hoñ tab jā ke javānī kaam kī hai

ye daulat bhī le lo ye shohrat bhī le lo
bhale chhīn lo mujh se merī javānī

bhale chhīn lo mujh se merī javānī
magar mujh ko lauTā do bachpan kā sāvan

ye daulat bhī le lo ye shohrat bhī le lo
bhale chhīn lo mujh se se merī javānī

laḌakpan meñ ye zid hai jaanī tumhārī
abhī dekhnī hai javānī tumhārī

phir javānī hai abhī kuchh hai laḌakpan un kā
do daġhā-bāzoñ ke phande meñ hai joban un kā

bahā kar le gayā tūfāñ javānī
lab-e-sāhil safīna aa gayā hai

ab zo.af ke panja se nikalnā ma.alūm
piirī kā javānī se badalnā ma.alūm

aa.ī thī javānī ham par bhī ham ne bhī bahāreñ dekhī haiñ
is daur se ham bhī guzre haiñ ik ḳhvāb-e-pareshāñ hotā hai

tire lab mere lab ke mā-hasal haiñ
tire sadqe javānī likh rahā huuñ

isī mast-e-javānī ke qadam baḌh kar liye hoñge
chaman meñ chal rahī hai jo sabā laġhzīda laġhzīda

ye ahd-e-javānī bhī hai kuchh aisā zamāna
be-bāda-e-sarjosh basar ho nahīñ saktā

sho.ala nahīñ shabnam bhī nahīñ
bas be-rañg javānī hai

dekh ke is muñh-zor javānī kī muñh-zorī
mujh ko is kā totlā bachpan yaad aatā hai

ai javānī tū kahānī ho ga.ī
ham nahīñ vo yā zamāna aur hai

ġhazab kā kaaT kar kartī haiñ adā.eñ us parī-vash kī
ubhāroñ par hai joban aur aalam hai javānī kā

suniye ik nā-āqibat-andesh kī fariyād hai
kah rahā hai vo mujhe apnī javānī yaad hai

balā hai ahd-e-javānī se ḳhush na ho ai dil
sambhal ki umr kī duniyā meñ inqalāb aayā

yaad the ham ko javānī meñ to sau makr-o-fareb
ik karishma thā tumheñ daam meñ laanā sāhab