Tags-Jawani

vo be-niyāz sahī dil matā-e-hech sahī
magar kisī kī javānī machal to saktī hai

urūs-e-dahr chale khā ke Thokareñ lekin
qadam qadam pe javānī ubal to saktī hai

ġhurūr-e-husn kā sadqa koī jaatā hai duniyā se
kisī kī ḳhaak meñ miltī javānī dekhte jaao

ḳhākistar-e-badan meñ sulagtī hai koī chiiz
bujhtā nahīñ abhī ye javānī kā shor bhī

ho rahā hai jazb mahr-e-ḳhūñ-chakāñ ke rū-ba-rū
kañkaroñ kī nabz meñ uThtī javānī kā lahū

mirī alhaḌ javāñ zulfoñ ko abyaz dekh kar logoñ
buzurgī muskurātī hai javānī chīḳh paḌtī hai

umr se kyā bahār kā lenā
nahīñ muhtāj ye javānī kī

jū-e-nashāt ban ke bahā le ga.ī mujhe
āvāz thī ki sāz-e-javānī kā aks thā

balā hai qahr hai aafat hai fitna hai qayāmat kā
hasīnoñ kī javānī ko javānī kaun kahtā hai

javānī vasl kī lazzat pe rāġhib kar hī detī hai
tumheñ is baat kā ġham kyuuñ hai aisā ho hī jaatā hai

jo jā ke na aa.e phir javānī hai ye shai
par haif nasīb-e-rā.egānī hai ye shai

mastī ke valvaloñ kā javānī meñ lutf hai
piirī meñ dhyān chāhiye qadd-ḳhamīda kā

ai charḳh-e-pīr-zor javānī se dar-guzar
ab paas chāhiye tujhe pusht-e-ḳhamīda kā

muflis kī javānī eid ke din jab sub.h se aaheñ bhartī hai
duniyā ye amīroñ kī duniyā tab eid kī ḳhushiyāñ kartī hai

jab chaḌhī us par javānī kī parat
zāviye us ke kaTīle ho ga.e

go javānī meñ thī kaj-rā.ī bahut
par javānī ham ko yaad aa.ī bahut

vo javānī ki thī harīf-e-tarab
aaj barbād-e-jām-o-sahbā hai

bechain umañgoñ ne na samjhā hī na dekhā
betāb javānī ke nazāre haiñ ye aañsū

kī shab-e-hashr mirī shām-e-javānī tum ne
chheḌī kis daur kī kis vaqt kahānī tum ne

talātum aarzū meñ hai na tūfāñ justujū meñ hai
javānī kā guzar jaanā hai dariyā kā utar jaanā