Tags-Jawani

kis kī chāhat kī tāsīr hai, vaqt ne
us ke paikar meñ rakh dī javānī na.ī

paimāna-ba-kaf jab ho javānī kī hikāyat
is baab meñ sanjīda savālāt na karnā

hijr ko hausla aur vasl ko fursat darkār
ik mohabbat ke liye ek javānī kam hai

husn faanī hai javānī ke fasāne tak hai
par ye kam-baḳht mohabbat to zamāne tak hai

bechārī ke ārām kī sūrat hī kahāñ hai
beva kī javānī bhī ajab āfat-e-jāñ hai

do nigāhoñ kā javānī meñ hai aisā milnā
jaise dīvāne kā milnā kisī dīvāne se

abhī javānī hai mai-kade par abhī to bādal bhī hai ghanerā
abhī to zinda hai husn saaqī abhī salāmat hai ishq merā

ye javānī ye ghaTā.eñ ye havā.eñ ye bahār
hazrat-e-'aḳhtar' abhī se pārsā kyuuñ ho ga.e

kis tarah javānī meñ chalūñ raah pe nāseh
ye umr hī aisī hai sujhā.ī nahīñ detā

loriyāñ dī haiñ kisī qurb kī ḳhvāhish ne mujhe
kuchh javānī ke bhī din guzre haiñ bachpan kī tarah

aaj jo biitī hai dil par mājrā us kā suno
dāstān-e-ishrat-e-ahd-e-javānī phir sahī

taaza kaliyoñ ke tabassum kā sabab kyā hogā
aayā kartī hai javānī meñ hañsī aap hī aap

talātum aarzū meñ hai na tūfāñ justujū meñ hai
javānī kā guzar jaanā hai dariyā kā utar jaanā

ab vo piirī meñ kahāñ ahd-e-javānī kī umañg
rañg maujoñ kā badal jāatā hai sāhil ke qarīb

jab bhaḌak uTThā thā tere qurb se merā badan
naam un hassās lamhoñ kā javānī ho gayā

javānī ne diye haiñ un ko lā kar ham-nashīñ kyā kyā
adā meñ naaz chitvan meñ hayā āñkhoñ meñ mastī hai

be-hijābāna vo sāmne aa ga.e aur javānī javānī se Takrā ga.ī
aañkh un kī laḌī yuuñ mirī aañkh se dekh kar ye laḌā.ī mazā aa gayā

mash.hūr javānī meñ ho vo kyuuñ na jagat-bāz
mailān-e-tabī.at thā laḌakpan se zile par

chaman meñ dekh ġhunchoñ ko javānī apnī yaad aa.ī
fasāna sun ke bulbul kā kahānī apnī yaad aa.ī

chhāyā rahā ho jaise buḌhāpā nafas nafas
guzrī hai aise apnī javānī parat parat