Tags-Jawani

farishtoñ se mohabbat kar rahe haiñ
javānī meñ ibādat kar rahe haiñ

jab ahd-e-javānī kī ThanDī ThanDī barsāteñ hotī haiñ
matvālī umreñ hotī haiñ matvālī rāteñ hotī haiñ

har vaqt suhānā kyā kahnā har raat suhānī kyā kahnā
barsāt ke bhīge lamhoñ meñ shādāb javānī kyā kahnā

bhaTak rahe haiñ javānī ke nā-rasā-lamhāt
bahut se ghar the jinheñ ek ghar ne chhīn liyā

yaad aate haiñ javānī ke junūñ-ḳhez ayyām
muztarib ho ke bayābāñ ko sadā.eñ denā

ham javānī talak pahuñch aa.e
yā-ilāhī ye mājrā kyā hai

jis ko ham ne nichoḌ pheñkā hai
us javānī meñ ab bachā kyā hai

kyā lutf āshiqī kā ab rah gayā hamārī
yaañ āḳhir-e-javānī vaañ ibtidā-e-ālam

tū ne jo sazā dī thī javānī ke dinoñ meñ
maiñ umr kī chaukhaT pe khaḌā kaaT rahā huuñ

āñkheñ jhapkīñ ahd-e-javānī biit gayā
le kar kitne ḳhvāb suhāne aayā thā

javānī meñ ye nādānī kī bāteñ
vo kahte haiñ ki va.ade kī vafā kyā

javānī harīf-e-sitam hai to kyā ġham
taġhayyur hī aglā qadam hai to kyā ġham

merī darmāñda javānī kī tamannāoñ ke
muzmahil ḳhvāb kī tābīr batā de mujh ko

husn ko chāñd javānī ko kañval kahte haiñ
un kī sūrat nazar aa.e to ġhazal kahte haiñ

kaash hotā maza kahānī meñ
dil mirā bujh gayā javānī meñ

sin hī kyā hai abhī bachpan hī javānī meñ sharīk
so raheñ paas mire ḳhvāb meñ Darne vaale

javānī gañvāte haiñ jo zohd meñ
buḌhāpe meñ karte haiñ ḳhar mastiyāñ

javānī magar is qadar mastiyāñ
shab-o-roz shām-o-sahar mastiyāñ

javānī kī havā.eñ chal rahī haiñ
buzurgoñ kā ḳhazāna chal rahā hai

mirī javānī ke garm lamhoñ pe Daal de gesuoñ kā saaya
ye dopahar kuchh to mo.atadil ho tamām māhaul jal rahā hai