Tags-Jawani

umañg thī ye javānī kī yā koī āñdhī
milā ke ḳhaak meñ ham ko ga.ī bahār kahāñ

dil ke hāthoñ 'haqīr' jhagḌoñ meñ
merī guzrī sadā javānī hech

ab tak tum ne 'bāqar' aise kaun se kaam kiye
kis ummīd pe mālik tum ko na.ī javānī de

javānī meñ tabī.at lā-ubālī hotī jaatī hai
taraqqī par mirī shorīda-hālī hotī jaatī hai

abhī kal tak javānī ke ḳhumistāñ the nigāhoñ meñ
ye duniyā do hī din meñ rah ga.ī hai kyā se kyā ho kar

javānī ke zamāne yaad aa.e
mohabbat ke fasāne yaad aa.e

mirī javānī bahāroñ meñ bhī udaas rahī
fazā-e-dard-e-tamannā ko raas aa na sakī

surūr-ārā sharāb-e-arġhavānī ab bhī hotī hai
mire qadmoñ meñ duniyā kī javānī ab bhī hotī hai

tirī zālim mohabbat ne jise bad-nām kar Daalā
usī mazlūm kī rusvā javānī dekhte jaao

javānī jitne muñh utnī hī bāteñ
mohabbat aaj bhī rusvā nahīñ hai

tum ko ma.alūm javānī kā mazā hai ki nahīñ
ḳhvāb hī meñ kabhī kuchh kaam huā hai ki nahīñ

javānī aur yuuñ ghir jaa.e tūfān-e-havādis meñ
ḳhudā rakkhe abhī to be-ḳhudī kā daur hai saaqī

gayā javānī kā saath sab kuchh vo garmi-e-ishq ab kahāñ hai
jo maiñ ne us vaqt aah kī hai bujhī huī aag kā dhuāñ hai

chaar din meñ ye zamāna bhī guzar jā.egā
abhī ro.eñge javānī ko laḌakpan kaisā

ishq se kaam na thā husn kī parvā bhī na thī
yaad aatā hai javānī meñ laḌakpan kaisā

ik kāfir-e-mutlaq hai zulmat kī javānī bhī
be-rahm añdherā hai sham.eñ haiñ na parvāne

suḳhan meñ kāmrānī kar rahā huuñ
za.īfī meñ javānī kar rahā huuñ

giit haiñ javānī hai abr hai bahāreñ haiñ
muztarib idhar maiñ huuñ tū udhar pareshāñ hai

sochtā huuñ ki mohabbat hai javānī kī ḳhizāñ
us ne dekhā nahīñ duniyā meñ bahāroñ ke sivā

ye har adā pā.emāl ho kar bhī dil ko hai zauq-e-pā.emālī
qadam qadam par tirī javānī ajiib fitne jagā rahī hai