Tags-Jawani

bahāo khul ke ġharīboñ kā be-kasoñ kā lahū
nasīb se tumheñ hāsil zar-o-javānī hai

tabassum ne kisī ke ruuh phūñkī gulsitānoñ meñ
shagūfoñ ko javānī kā yaqīn-o-e'tibār aayā

abhī javānī pe haiñ umañgeñ diloñ meñ haiñ saiñkaḌoñ tarañgeñ
jo do charāġh aaj bujh rahe haiñ to das charāġh aur jal rahe haiñ

bazm-e-afsāna karo ḳhatm javānī guzrī
qābil-e-zikr ab aage koī rūdād nahīñ

ik qayāmat hai javānī ik qayāmat hai shabāb
har tabassum ek tūfāñ har nazar ik inqalāb

apnī ujḌī huī duniyā kī kahānī huuñ maiñ
ek bigḌī huī tasvīr-e-javānī huuñ maiñ

ālam-afroz tapish tere liye laayā huuñ
ai ġham-e-ishq tirā ahd-e-javānī huuñ maiñ

haa.e kyā qahr hai marhūm javānī kī yaad
dil se kahtī hai ki ḳhanjar kī ravānī huuñ maiñ

ishq kī mastī dil kī dhaḌkan
ek javānī do do joban

ḳhizāñ meñ bhī bahār-e-jāvedāñ mālūm hotī hai
javānī ho to phir har shai javāñ mālūm hotī hai

maiñ ne bachpan se laḌakpan tak
laḌakpan se javānī tak

merī javānī kā sāthī mirā ā.īna
chāñdī ke har taar se uljhā rahtā hai

aadhā adhūrā hijr javānī chabā gayā
aadhe adhūre ishq meñ bachpan havā huā

ab tirī yaad bhī kam kam hī mujhe aatī hai
jaane kis tarah se guzrī hai javānī likh de

ham agar maare ga.e apnī javānī meñ kahīñ
naam likh denā mohabbat kī kahānī meñ kahīñ

apnī biitī huī rañgīn javānī degā
mujh ko tasvīr bhī degā to purānī degā

mai-kash-e-ġham kuuñ shab-e-mahtāb hai mū-e-safed
mausam-e-pīrī meñ sāmān-e-javānī kījiye

mahñgā.ī meñ har ik shai ke daam hue haiñ duune
majbūrī meñ bike javānī do kauḌī ke mol

ga.ī javānī to jaa.e dilbar mujhe hai ulfat hanūz baaqī
vo iltijā bhī nahīñ ga.ī hai vo justujū bhī nahīñ ga.ī hai

Dhal gayā ahd-e-javānī ho gayā āḳhir shabāb
zindagī apnī bhī charḳh-e-pīr aadhī rah ga.ī