Tags-Justaju

ik umr kaT ga.ī magar ab tak hai justujū
din kāTne kā fan koī ījād kar sakūñ

nahīñ nigāh meñ manzil to justujū hī sahī
nahīñ visāl mayassar to aarzū hī sahī

savāl thā ki justujū aziim hai ki aarzū
so yuuñ huā ki umr bhar javāb likh rahe the ham

saare ḳhāne mahak uThe dil ke
tujh ko paane kī justujū kar ke

zikr tā fikr nazar tak mahdūd
justujū saarī ḳhabar tak mahdūd

'rishī' nākām sa.ī-e-justujū hai zauq-e-nazzāra
nazar āvāra fitrat hai jahāñ jalvoñ kī kasrat hai

savāl uThtā nahīñ koī yahāñ hadd-e-ta.ayyun kā
vahāñ tak justujū bhī hai jahāñ tak husn-e-fitrat hai

ham ko manzil-shanāsī pe bhī naaz hai aur ham āshnā-e-havādis bhī haiñ
jū-e-ḳhūñ se guzarnā paḌe bhī to kyā justujū ko to ik rāstā chāhiye

maiñ ka.ī barsoñ se terī justujū kartī rahī
is safar meñ ārzūoñ kā lahū kartī rahī

tirī justujū tirī aarzū mujhe kaam tere hī kaam se
tū hī zindagī kā hai mudda.ā mirā naam tere hī naam se

karnī paḌī na aur kahīñ justujū mujhe
ka.abe hī ke hudūd meñ but-ḳhāna mil gayā

yahī nahīñ ki faqat tirī justujū bhī maiñ
ḳhud apne aap ko paane kī aarzū bhī maiñ

visāl-e-fardā kī justujū meñ nashāt-e-imroz ghaT rahā hai
ye kis talab meñ ghirā huā huuñ ye kis aziyyat meñ aa basā huuñ

mā.il-ba-justujū haiñ abhī ahl-e-ishtiyāq
duniyā.eñ aur bhī haiñ varā-e-nazar kahīñ

manzil kahāñ hai duur talak rāste haiñ yaar
kis justujū meñ ḳhvāb ke ye qāfile haiñ yaar

na.e savāl na.e tajarbe na.e chehre
hazār moḌ haiñ ik merī justujū ke liye

qalam ko hai usī sūrat-kade kī justujū ya.anī
kahīñ pinhāñ thī vo sūrat jo paidā ho ga.ī āḳhir

tum paas jo aa.e kho ga.e ham
jab tum na mile to justujū kī

ab justujū kā ruḳh jo muḌā hai to mat pukār
sab tujh ko DhūñDte the magar tū kahāñ milā