Tags-Justaju

thā kisī saa.e kā ḳhayāl thī kisī gul kī justujū
dasht kī samt chal diyā dekh ke rāstā mujhe

koī qarya koī dayār ho kahīñ ham akele nahīñ rahe
tirī justujū meñ jahāñ ga.e vahīñ saath dar-badarī rahī

vo dil kī aag to yārab kabhī kī sard huī
magar in āñkhoñ ko ab bhī hai justujū kis kī

rah-e-justujū meñ bhaTak ga.e to kisī se koī gilā nahīñ
ki ham us ke ho ke na jī sake vo hamārā ban ke milā nahīñ

be-sabab Thiik nahīñ ghar se nikal kar jaanā
justujū ho koī dil meñ to safar par jaanā

gulshan meñ sabā ko justujū terī hai
bulbul kī zabān pe guftugū terī hai

tirī vahshat liye phirtī hai garm-e-justujū mujh ko
sukūñ-andoz hone kī bahut hai aarzū mujh ko

qasam fareb-e-nigāh-o-dil kī hameñ to us justujū ne khoyā
vahīñ thī dar-asl apnī manzil qadam uThe the jahāñ se pahle

hai abhī merī justujū jaarī
ya.anī ḳhud ko milā nahīñ huuñ maiñ

hasrat-e-dād-e-justujū na rahī
aisī bigḌī hai baat andar se

kuchh to tabī.atan bhī the āvāra-gard ham
kuchh terī justujū ne hameñ dar-ba-dar kiyā

har aarzū fareb hai har justujū sarāb
machle jo dil bahut use samjhā diyā karo

justujū-dar-justujū āsān har mushkil samajh
ġham na kar tadbīr ko taqdīr kā hāsil samajh

tirī aarzū tirī justujū meñ bhaTak rahā thā galī galī
mirī dāstāñ tirī zulf hai jo bikhar bikhar ke sañvar ga.ī

rahī hai ba.ad-e-murdan bhī tumhārī justujū kyā kyā
ġhubār-e-ḳhāk-e-marqad uḌ rahā hai chār-sū kyā kyā

pareshāñ-ḳhātirī kahtī hai apnī
kisī kī justujū hai aur maiñ huuñ

is be-ḳhudī kī ḳhair tirī justujū meñ ham
apnā hī naam aap pukāre chale ga.e

tez hai kārvān-e-vaqt tishna hai justujū abhī
rok luuñ zindagī kahāñ shām-o-sahar ko kyā karūñ

gir ga.ī muñdrī zamīñ kī dhuup ke tālāb maiñ
justujū meñ ik jahān-e-be-nishāñ thā aur maiñ