Tags-Justaju

koī ḳhabar hī na thī marg-e-justujū kī mujhe
zamīñ phalāñg gayā apne shauq-e-behad meñ

kamāl-e-zīst terī justujū hai
ye tarz-e-sa.ī hadd-e-ābrū hai

chamaktī os kī sūrat guloñ kī aarzū honā
kisī kī soch meñ rahnā kisī kī justujū honā

vo tujh meñ hai tū hai usī meñ har-dam
kyā us kā surāġh-o-justujū hai

justujū merī kahīñ thī aur maiñ bhaTkā kahīñ
mil ga.ī manzil mujhe to kho gayā rastā kahīñ

ḳhvāhish thī justujū bhī thī dīvāngī na thī
sahrā-navard ban ke bhī vahshat nahīñ milī

jān-levā sahī justujū kī thakan
par sahārā diye ik javāñ ḳhvāb hai

thī jis kī justujū vo haqīqat nahīñ milī
in bastiyoñ meñ ham ko rifāqat nahīñ milī

sañg-e-manzil ye chheḌtā hai mujhe
aa tujhe merī justujū thī bahut

dekhnā jis din unheñ maqsad samajh meñ aa.egā
manziloñ kī justujū meñ rahguzar ho jā.eñge

sab haiñ manzil kī justujū meñ yahāñ
kaun dekhe burā bhalā rasta

ye shahr hai yahāñ apnī hī justujū meñ log
mileñge chalte hue chiyūñTiyoñ ke dal kī tarah

koī bhī in meñ chārasāz na thā sabhī bīmār-e-justujū nikle
tum hī socho ki be-dilī kis se rāsta pūchhtī tamāshe meñ

asīr-e-ḳhvāb na.ī justujū ke dar kholeñ
havā pe haath rakheñ aur apne par kholeñ

maiñ shahīd-e-zulmat-e-shab sahī mirī ḳhaak ko yahī justujū
koī raushnī koī raushnī koī raushnī koī raushnī

justujū ab hai masarrat kī na to ġham kī talāsh
be-hisī mujh ko kahāñ le ke chalī aa.ī hai

rah-e-najāt meñ manzil kī justujū kis ko
ye vo safar hai ki jis meñ kabhī thakān na ho

ek ajiib raag hai ek ajiib guftugū
saat suroñ kī aag hai āThvīñ sur kī justujū

kab thī firdaus-e-barīñ meñ lazzat-e-lutf-e-gunah
is zamīñ kī justujū meñ kuchh ziyāñ honā hī thā

paidā kareñ jo tujh ko unhīñ ko hai dastaras
pāmard haiñ vahī jo tirī justujū kareñ