Tags-Justaju

ġhazal meñ justujū rakhtā huuñ maiñ mafhūm-e-tāzā kā
mire nāqid maiñ ḳhud lafzoñ kī ārā.ish se Dartā huuñ

justujū jab tirī nahīñ hogī
merī manzil koī nahīñ hogī

ik tiflak-e-justujū huuñ shāyad
maiñ apne badan se kheltī huuñ

ḳhud-shanāsī thī justujū terī
tujh ko DhūñDā to aap ko paayā

apne maazī kī justujū meñ bahār
piile patte talāsh kartī hai

kisī kī justujū meñ 'vajd' us manzil pe pahuñchā huuñ
jahāñ manzil bhī gard-e-kārvāñ mālūm hotī hai

peT kī aag kyoñ nahīñ bujhtī
justujū kar rahe haiñ ham kab se

ham ek baar muhayyā na kar sake tujh ko
hazār rañg tirī justujū meñ bharte haiñ

tere naqsh-e-qadam bhī mile jā-ba-jā terī mahfil tirā āstāñ bhī milā
haañ magar tū kisī ko nahīñ mil sakā ho ke nākām har justujū rah ga.ī

justujū kā koī anjām to zāhir ho 'nadīm'
ik musalmāñ to nazar aa.e musalmānoñ meñ

kahīñ ye sail-e-safar rā.egāñ na sābit ho
ki justujū ke shab-o-roz kā shumār nahīñ

ḳhudā mālūm dil ko justujū hai kin jazīroñ kī
na jaane kin sitāroñ kī ziyā ko dekhtā huuñ maiñ

jis ko āñkheñ DhūñDhtī thiiñ pā ga.iiñ
dil ko jis kī justujū thī mil gayā

khulā lab-e-gor se ye uqda ki ḳhvāb thī sab numūd-e-hastī
vuqūf nā-mahrūmī-e-manzil kamāl hai merī justujū kā

koī kis tarah paa.e us ham-nashīñ ko
jise justujū manziloñ duur kar de

jinheñ ho sakā na hāsil kabhī kaif-e-qurb-e-manzil
vahī do-qadam haiñ mujh ko tirī justujū se pyāre

yā kabhī manzil thī maqsūd-e-mazāq-e-justujū
yā mazāq-e-justujū maqsūd-e-manzil ho gayā

jab bhī karoge haq ko miTāne kī justujū
mīnāroñ masjidoñ kī rahegī kalas se jañg

justujū jis kī thī us ko to na paayā ham ne
is bahāne se magar dekh lī duniyā ham ne

ho justujū meñ jis kī hai vo mazār kaisā
kyā apnī qabr kā tum lene surāġh nikle