Tags-Justaju

justujū ko tū sub.h roz ugā
is meñ shāyad kabhī to taab aa.e

surūr-e-justajū maġhrib kī matvālī havāoñ kā
sabhī paayā magar darmān-e-dard bebasī mushkil

mire e'timād ko ġham milā mirī jab kisī pe nazar ga.ī
isī justujū isī karb meñ mirī saarī umr guzar ga.ī

har sub.h-o-shām baaġh meñ sahrā meñ juuñ nasīm
us gul kī justujū kī havas par ḳharāb huuñ

kamar kī justujū se kyā dahan kī aarzū kyuuñ ho
mohabbat ke marāhil meñ adam yuuñ bhī hai aur yuuñ bhī

pukār uThtā vo aa kar diloñ kī dhaḌkan meñ
ham apne siine meñ gar us kī justujū karte

masarrat aah tū bastī hai kin sitāroñ meñ
zamīñ pe umr huī terī justujū karte

gardish se hai mahr-o-mah ke sābit
un ko bhī hai justujū tumhārī

aur karnī hai justujū apnī
aur phirnā hai dar-ba-dar shāyad

ḳhudā kare na kabhī lazzat-e-safar kam ho
tamām-umr hameñ terī justujū hī rahe

sulā rahī hai beach raah meñ thakan hameñ 'charāġh'
jagā rahī hai justujū magar tire dayār kī

dil-e-ġhamīñ ke muāfiq nahīñ hai mausam-e-gul
sadā-e-murġh-e-chaman hai bahut nashāt añgez

kisī ke naqsh-e-qadam kī thī justujū varna
maiñ is tarah to 'suḳhan' dar-ba-dar nahīñ hotā

ik umr justujū meñ guzārī to ye khulā
vo mere paas thā maiñ jise DhūñDhtā rahā

tumhāre dair-o-haram ke jalve tumheñ mubārak tumhīñ sambhālo
mujhe haqīqat kī justujū hai maiñ ḳhvāb-zāroñ kā kyā karūñgā

jaane kis kī justujū meñ thī hayāt-e-muḳhtasar
umr-bhar bhāgā kiye aur haath aayā kuchh nahīñ

tirī justujū bhī hijāb hai tirī aarzū bhī hijāb hai
kabhī dām-e-aql-o-shu.ūr se jo nikal sake to nikal ke aa

safar kī ruuh thā vo zauq-e-justujū 'tālib'
jise charāġh-e-sar-e-rahguzar ne chhīn liyā

ye vasl bhī hai kisī aur justujū jaisā
kisī ke paas kisī ke gumāñ meñ rahtī huuñ

havā chalī thī har ik samt us ko paane kī
na kuchh bhī haath lagā gard-e-justujū ke sivā