Tags-Justaju

kuchh din tirā ḳhayāl tirī aarzū rahī
phir saarī umr apnī hameñ justujū rahī

kyuuñ 'josh' rāz-e-dost kī kartā hai justujū
kah do koī ki shaah kā haal ai gadā na pūchh

ādmiyat ke sivā jis kā koī maqsad na ho
umr bhar us aadmī kī justujū karte raho

junūñ kam justujū kam tishnagī kam
nazar aa.e na kyuuñ dariyā bhī shabnam

tū hī batā ki chāheñ tujhe aur kis tarah
ye terī justujū ye tamannā nahīñ to kyā

abhī to gum-karda-rāh ḳhud haiñ mai-e-mohabbat kī be-ḳhudī meñ
agar kabhī aap meñ ham aa.e to us kī bhī justujū kareñge

hue haiñ gum jis kī justujū meñ usī kī ham justujū kareñge
rakkhā hai mahrūm jis ne ham ko usī kī ham aarzū kareñge

maiñ azal kā rāh-rau mujh ko abad kī justujū
gard-e-rah mere jilau meñ saath mere maiñ na tū

tū ḳhud mile na mile justujū kī daad to de
nishāñ mirā bhī miTā de na de nishāñ mujh ko

maanā vo dasht-e-shauq meñ pyāsā hī mar gayā
ik jhiil justujū kī pas-e-tishnagī to thī

justujū karnī har ik amr meñ nādānī hai
jo ki peshānī pe likkhī hai vo pesh aanī hai

hameñ apne ghar se chale hue sar-e-rāh umr guzar ga.ī
koī justujū kā sila milā na safar kā haq hī adā huā

tum apnī justujū meñ ye mirā shauq-e-talab dekho
tumhāre ishq meñ luT kar bhī tum tak jān-e-jāñ pahuñchā

tāza-ruḳhī-e-kā.enāt DhūñD rahī hai aa.ina
justujū hai hazār meñ ek gavāh ke liye

justujū aa ga.ī sar-e-manzil
rah gayā raah meñ ġhubār apnā

justujū saath hai sham-e-rah-e-manzil ban kar
apnī be-rāh-ravī bhī hai gavārā mujh ko

mirī justujū kā hāsil mirā shauq-e-vālihāna
mirī aarzū kī manzil na chaman na āshiyāna

kal zindagī ke ḳhvāb kī ta.abīr mil ga.ī
thī jis kī mujh ko justujū vo hiir mil ga.ī

taqāzā-e-tamannā se na ik jā do-ghaḌī baiThe
phirāyā umr-bhar aalam meñ terī justujū ho kar

sukūnat se bahut baḌh ke hai merī ḳhāna-bar-doshī
rahā kartā huuñ har ḳhātir meñ terī justujū ho kar