Tags-Justaju

mileñge raah meñ aise aise bhī ham-safar 'tābāñ'
qadam qadam jinheñ manzil kī justujū hogī

na koī aarzū hai ab na koī justujū mujh ko
mujhe kyuuñ zindagī se ab milāyā hai muqaddar ne

tujhe merī justujū hai mujhe aarzū hai terī
tirā e'tibār maiñ huuñ mirā e'tibār tū hai

sāhil se duur rah ke hai manzil kī justujū
maujoñ kī fikr ham ko na tūfāñ kī fikr hai

barg-e-āvāra se koī pūchhe
bū-e-gul kis kī justujū meñ ga.ī

justujū hai achchhe din kī har taraf
ḳhuub se ab ḳhūb-tar bhī kījiye

mirī aarzū thī ki jāñ-ba-kaf mirī justujū ki nafas ba-pā
ab ai zindagī mujhe chhoḌ jā ki ye hālateñ bhī chalī ga.iiñ

safar kā bojh uThāne se peshtar 'sājid'
mizāj-dān-e-rah-e-justujū bhī honā thā

ba-juz mauj-e-fanā duniyā meñ 'mohsin'
hamārī justujū kis ko rahī thī

justujū kā ik ajab silsila tā-umr rahā
ḳhud ko khonā thā kahīñ aur kahīñ DhūñDhnā thā

maut hai justujū musāfir kī
ek lamha jo be-ḳhabar Thahre

bahr pyāse kī justujū meñ hai
hai sadaf kī talāsh gauhar ko

kab se 'nāsiḳh' ye justujū hai mujhe
aaj vo ḳhānumāñ-ḳharāb milā

garm-e-talāsh-o-justujū ab hai tirī nazar kahāñ
ḳhuun hai kuchh jamā huā qalb kahāñ jigar kahāñ

ye kis kī justujū hai aur maiñ huuñ
maqām-e-dasht-e-hū hai aur maiñ huuñ

justujū kā ye chakkar
khīñch le gayā har pal

dil meñ apne aarzū sab kuchh hai aur phir kuchh nahīñ
do jahāñ kī justujū sab kuchh hai aur phir kuchh nahīñ

jalā hai jism jahāñ dil bhī jal gayā hogā
kuredte ho jo ab raakh justujū kyā hai

isī liye to hai zindāñ ko justujū merī
ki muflisī ko sikhā.ī hai sar-kashī maiñ ne

maiñ vo tanhā subuk-pā musāfir thā takmīl kī justujū
khīñch laa.ī thī ik roz jis ko yahāñ