Tags-Justaju

mohabbat kī hadeñ is ālam-e-imkāñ se baalā haiñ
kisī kī justujū meñ lā-makāñ baaqī na rah jaa.e

aish-e-duniyā kī justujū mat kar
ye dafīna milā nahīñ kartā

daad mahjūrī kī phir hai justujū
de na dhokā apnī qismat dekhnā

hai mirī nigāh meñ sirf tū kisī aur kī nahīñ justujū
tire iltifāt kī aarzū tirī be-ruḳhī kā gilā bhī hai

kise DhūñDhtī haiñ har-sū mirī be-qarār nazreñ
tū ye ḳhuub jāntā hai mujhe kis kī justujū hai

jis kī tujh ko justujū hai vo tujhī meñ hai 'zafar'
DhūñDtā phir phir ke to phir jā-ba-jā kyā chiiz hai

ajiib bhūl-bhulayyāñ hai shāhrāh-e-hayat
bhaTakne vaale yahāñ justujū kī baat na kar

maiñ sargardāñ huuñ us kī justujū meñ
vo kahtā hai ki mujh ko DhūñDtā hai

na kar aaj ham se ye guftugū mujhe kyuuñ huī tirī justujū
are ham bhī ek ḳhayāl the so tire bhī zehn meñ aa ga.e

manzil kī justujū meñ akele nahīñ haiñ ham
hamrāh to nahīñ hai tirā naqsh-e-pā to hai

na dhund chhaTtī hai āñkhoñ ke sāmne se kabhī
na dil se hausla-e-justujū nikaltā hai

apnoñ kī justujū hai apne magar kahāñ haiñ
logoñ ne jaane ham ko kis kā patā diyā hai

maiñ manziloñ kī justujū meñ thā ba-rañg-e-mauj
ab raqs kar rahā huuñ mohabbat kī thaap par

koī aas mujh ko roke tirī justujū se kāfir
maiñ agarche ho chukā thā kabhī sharmsār ab tak

mirī hālatoñ meñ nihāñ haiñ ab tirī justujū kī ḳharābiyāñ
na maiñ ġham-zada na maiñ shādmāñ mirā haal bhī koī haal hai

safar safar mire qadmoñ se jagmagāyā huā
taraf taraf hai mirī ḳhāk-e-justujū raushan

miTTī meñ māhtāb kī ḳhushbū kā bhed thā
kis justujū meñ ham lab-e-bām-e-azal ga.e

hue 'anjum' sahar kī justujū meñ
misāl-e-lukka-e-abr-e-ravāñ gum

dil se tujhe nikāl ke kuchh mutma.in to huuñ
phir bhī kahūñ ye kaise tirī justujū nahīñ

pesh-e-nazar thī manzil-e-jānāñ kī justujū
aur phir rahā huuñ apnā pata DhūñDtā huā