Tags-Justaju

tire husn ne jagāyā mere ishq-e-be-bahā ko
tirī justujū kahāñ thī mujhe shā.irī se pahle

yuuñ ḳhud ko chhoḌ kar nikle kisī kī justujū meñ
hamīñ ne umr-bhar phir rāsta dekhā hamārā

tum ko bhī shāyad hamārī justujū karnī paḌe
ham tumhārī justujū meñ ab yahāñ tak aa ga.e

vo daur ab kahāñ ki tumhārī ho justujū
is daur meñ to ham ko ḳhud apnī talāsh hai

duniyā kī justujū to ham se na ho sakegī
ye minnat aarzū to ham se na ho sakegī

justujū shart hai mil jā.egā ziina bhī zarūr
sāmne hai nazar-e-shauq ke mukhḌā terā

hamārī justujū hai ham tire iqrār tak pahuñcheñ
hamārā ḳhvāb ik inkār se aage nahīñ baḌhtā

ḳhirad vaalo ḳhabar bhī hai kabhī aisā bhī hotā hai
junūñ kī justujū meñ aap hī vīrāna aatā hai

hindū chalā gayā na musalmāñ chalā gayā
insāñ kī justujū meñ ik insāñ chalā gayā

justujū hī diloñ kī manzil thī
ham ne kho kar tujhe, tujhe paayā

ai shaḳhs maiñ terī justujū se
be-zār nahīñ huuñ thak gayā huuñ

ajiib bhūl-bhulayyāñ hai justujū ḳhud kī
har ek naqsh-e-qadam inhirāf kartā hai

ḳhud kī talāsh meñ hī zamāne guzar ga.e
kyā apnī justujū hī ke dām-e-sahar meñ huuñ

ik shart-e-justujū bhī thī manzil ke vāste
ham ne bas aarzū ko hī kaafī samajh liyā

maiñ to is kī justujū meñ thā guzar aayā magar
dasht-e-māzī der tak bū-e-vafā detā rahā

ai justujū kahāñ ga.e vo hausle tire
kis dasht meñ ḳharāb tirā qāfila huā

use dekhne kī thī aarzū mujhe us kī thī baḌī justujū
magar us ke āriz-e-nāz pe mirī har nigāh phisal ga.ī

ash.ār meñ jo mere kiran justujū kī hai
mīrās ye bhī tere hī mohar-e-numū kī hai

visāl kī justujū meñ 'hasrat' chalā na zaarī na zor kā kuchh
bahut se yaañ ham ne Dhab nikāle ze-āb avval do.am ba-ātish