Tags-Justaju

tumhārī justujū kī hai vahāñ tak
nahīñ pahuñche jahāñ vahm-o-gumāñ tak

raakh kā Dher haiñ mah-o-anjum
raakh meñ justujū kiye jaao

ab ke mil kar dekhiye kyā rañg ho
phir hamārī justujū hone lagī

ye gum hue haiñ ḳhayāl-e-visāl-e-jānāñ meñ
ki ghar meñ phirte haiñ ham apnī justujū karte

ḳhud apnī zaat kī tash.hīr kū-ba-kū kiye jaa.eñ
ḳhudā mile na mile us kī justujū kiye jaa.eñ

dast-e-duā ko miltī hai tāsīr arsh se
jo haath se ho paañv se vo justujū na ho

hameñ bhī matlab-o-ma.anī kī justujū hai bahut
harīf-e-harf magar ab ke dū-ba-dū hai bahut

vo to ḳhvāboñ kā shāhzāda thā
ab magar us kī justujū bhī nahīñ

kis ne sochā thā ye 'māhir' justujū ke josh meñ
jañgaloñ meñ vāpsī ke rāste ho jā.eñge

phir jahān-e-tāza kī ham justujū karne lage
phir ḳharābe meñ tabī.at apnī ghabrāne lagī

yahāñ-vahāñ se idhar-udhar se na jaane kaise kahāñ se nikle
ḳhushī se jiine kī justujū meñ hazār ġham ek jaañ se nikle

be-niyāzāna maiñ apnī justujū meñ gum rahā
yaad un kī mere dil meñ aa ke sharmā.ī bahut

mā.il-e-parvāz har lahza hai murġh-e-justujū
maiñ jo sīḌhī par chaḌhā vo aur uupar ho gayā

sārbāñ kis justujū meñ hai yahāñ majnūñ kahāñ
ab bagūlā bhī na bhaTkegā tire mahmil ke paas

mujhe us junūñ kī hai justujū jo chaman ko baḳhsh de rañg o bū
jo naved-e-fasl-e-bahār ho mujhe us nazar kī talāsh hai

kūlhoñ meñ bhañvar jo haiñ to kyā hai
sar meñ bhī hai justujū kā jauhar

jo dam meñ dam hai to saaqī kī justujū hī sahī
nahīñ sharāb to saudā-e-ārzū hī sahī

tirī justujū ke sadqe ye khulā hai raaz mujh par
ki myān-e-dair-o-ka.aba koī fāsla nahīñ hai

uf ye ma.āl-e-justajū ba.ad-e-kamāl-e-justajū
pahuñche vahī jagah kahne lagī yahāñ kahāñ

mirī tarah se mah-o-mahr bhī haiñ āvāra
kisī habīb kī ye bhī haiñ justujū karte