Tags-Justaju

nigāh meñ liye hue ghuTī ghuTī sī justujū
bhaTak rahe haiñ vādī-e-ḳhizāñ meñ bahr-e-rañg-o-bū

justujū us peḌ kī kyuuñ ho ki jo saaya na de
haath us Daalī pe kyā pahuñche ki jis par phal na ho

pahlī sīḌhī pe qadam rakh āḳhirī sīḌhī pe aañkh
manziloñ kī justujū meñ rā.egāñ ik pal na ho

phirā gar āsmāñ to shauq meñ tere hai sargardāñ
agar ḳhurshīd niklā terā garm-e-justujū niklā

hai vo jab dil meñ to kaisī justujū
DhūñDne vāloñ kī ġhaflat dekhnā

justujū hai mujhe aaj us shaḳhs kī
jo vafā bhī kare bevafā kī tarah

justujū jis kī yahāñ par kī 'munīr'
us se milne kī ḳhushī hai us taraf

tamām zindagī is justujū meñ guzrī hai
na khul sakā kisī sūrat bhī zindagī kā raaz

kahīñ nākām rah jaa.e na zauq-e-justujū apnā
adam se bhī ḳhayāl-e-yār ham-āġhosh ho jaanā

abas hai raaz ko paane kī justujū kyā hai
ye chāk-e-dil hai use hājat-e-rafū kyā hai

jab justujū na manzil aur ḳhvāb haiñ na armāñ
phir kis liye safar kā sāmān dekhtā huuñ

ḳhvāboñ ko, justujū ko, rakhnā abhī safar meñ
kuchh duur chal ke rāheñ āsān dekhtā huuñ

kab tak ġhamoñ se chuur savāloñ kī khetiyāñ
sailāb-e-justujū se bachātā rahe koī

ravāñ hai qāfila-e-justujū kidhar merā
koī samajh na sakā maqsad-e-safar merā

ḳhaak chhanvātī hai ye rātoñ ko kis kī justujū
chāñdnī kī tarah phailā dasht o dar meñ kaun hai

ab aadmī kī jis pe musallat machine hai
ab zar kī justujū hai ḳhudā phir kabhī sahī

hai justujū ki ḳhuub se hai ḳhūb-tar kahāñ
ab Thahartī hai dekhiye jā kar nazar kahāñ

ye kyā manzil na aa.egī hamāre rū-ba-rū kab tak
raheñge dasht-e-ġhurbat meñ asīr-e-justajū kab tak

talāsh kī shiddatoñ ne arz-o-samā kī sab dūriyāñ miTā diiñ
so maiñ ne ab terī justujū ko shadīd karne kī Thaan lī hai

jis din kī muddatoñ se hai 'naushād' justujū
kyā jaane din hameñ vo mayassar bhī aa.egā