Tags-Justaju

safar be-lazzatī kī justujū kā hai
ba-har-manzar ziyāñ-paimā.ī hai apnī

tirī justujū meñ ham ahl-e-tamannā
ḳhushī dekhte haiñ na ġham dekhte haiñ

maiñ ye chāhtā huuñ ki umr-bhar rahe tishnagī mire ishq meñ
koī justujū rahe darmiyāñ tire saath bhī tire ba.ad bhī

ḳhastagī ne kar diyā us ko rag-e-jāñ se qarīb
justujū zālim kahe jaatī thī manzil duur hai

aa gayā mausam-e-zamistāñ kyā
aag kī justujū meñ raat kaTī

sukūñ hai maut yahāñ zauq-e-justujū ke liye
ye tishnagī vo nahīñ jo bujhā.ī jaatī hai

justujū qā.ede kī ho varna
dar-ba-dar ḳhaak chhān leñge aap

justujū meñ tirī ye hāsil-e-saudā dekhā
ek ik zarre kā āġhosh-e-talab vā dekhā

ye ḳhud-e-farebi-e-ehsās-e-ārzū to nahīñ
tirī talāsh kahīñ apnī justujū to nahīñ

justujū nañg-e-ārzū niklī
dard rusvā huā davā ke liye

jism kī ḳhvāhish se nikal kar chaleñ zāviya justujū kā badal kar chaleñ
DhūñDne āgahī kī koī rahguzar ruuh ke vāste sā.ebāñ yā aḳhī

rizq kī justujū meñ kise thī ḳhabar tū bhī ho jā.egā rā.egāñ yā aḳhī
terī āsūda-hālī kī ummīd par kar ga.e ham to apnā ziyāñ yā aḳhī

safoñ meñ sāma.īn ke jo to bhī aa gayā to sun
terī bisāt-e-justujū kā aaj imtihān hai

kahāñ talāsh meñ jā.ūñ ki justujū tū hai
kahīñ nahīñ hai yahāñ aur chār-sū tū hai

uḌāne dete haiñ vahshat-zada tere koī din meñ
baḌhegī justujū ab sūrat-e-aksīr miTTī kī

ġhairoñ kī justujū kī muddat se aarzū hai
ye yaad vo nahīñ hai jis ko bhulā hī deñge

patthar ko tarāsh kar bhī dekho
ye fan bhī ḳhudā kī justujū hai

justujū itnī bhī be-ma.anī na thī
manziloñ ne bhī pukārā thā kabhī

to saarī justujū hī rā.egāñ thī
vo ik lamha rifāqat kā kahāñ hai

justujū kho.e huoñ kī umr bhar karte rahe
chāñd ke hamrāh ham har shab safar karte rahe