Tags-Kamar

terī zulfoñ kī tarah Dhal ke kamar tak pahuñchī
raat bal khātī huī bām-e-sahar tak pahuñchī

girnī thī ham pe barq-e-tajallī na tuur par
dete haiñ baada zarf-e-qadah-ḳhvār dekh kar

maiñ aap kamar-basta huuñ ab qatl pe apne
bin yaar hai jiine se mirā bas ki ḳhafā jī

ham qatl ho ga.e nahīñ tujh ko ḳhabar hanūz
bāñdhe phire hai ham pe miyāñ tū kamar hanūz

zulm par bāñdheñ kamar to al-amān-o-al-hafīz
misl-e-chañgez ik balā-e-be-amāñ hote haiñ log

tumhāre log kahte haiñ kamar hai
kahāñ hai kis tarah kī hai kidhar hai

us ne kis naaz se mirī gardan
kamar-e-shauq kas ke kaaTī hai

aa.e pariyoñ ke pare vasf-e-kamar khulvāne
misl-e-anqā ke maiñ mash.hūr huā ḳhuub huā

tasavvur se bhī dekhiye kyuuñ kamar ko
hijāb aate haiñ darmiyāñ kaise kaise

kamar-e-nāzuk o dahān-e-sanam
fikr bārīk hai muammā hai

kamar-e-yār kī likhtā huuñ nazākat jis dam
ḳhāma sau martaba kāġhaz pe lachak jaatā hai

jañgal hī hare tanhā rone se nahīñ mere
kohoñ kī kamar tak bhī jā pahuñchī hai sairābī

mujhe kyā agar tire dosh se tirī zulf tā-ba-kamar huī
ki maiñ aisā ḳhāna-ḳharāb huuñ kabhī chhāñv meñ na basar huī

zulmāt-o-adam meñ na rahā farq sar-e-mū
vo zulf-e-dotā chhuTte hī pahoñche hai kamar tak

allāh-re nāzukī ye chamelī kā ek phuul
sar par jo rakh diyā to kamar tak lachak ga.ī

sūjhtā kuchh nahīñ us vaqt miyāñ apne ta.iiñ
yaad jis vaqt tirī mū kamar aa jaatī hai

gar dushmanī pe dost ne bāñdhī mire kamar
dushman hai ab jo koī mirā dost-dār hai

kyā zarūrat ki hasīnoñ ke dahan kī ḳhātir
tum kamar bāñdh ke mulk-e-adamistāñ tak jaao

paañv kamar tak dhañs jaate haiñ dhartī meñ
haath pasāre jab ḳhuddārī rahtī hai

yaañ terī kamar hī jab na dekheñ
phir hech hai zindagī hamārī